Man United winger hlui Nani a chawl

Manchester United leh Portugal winger hlui Nani-a'n football khehl a chawlhsan thu a puang. Kum 38 mi Nani hian an khaw club Estrela Amadora-ah a hun tawp a hmang a, November 1 khan a club hmasa ber Sporting nen an inhmachhawn ṭumin a match hnuhnung ber a khel a ni.

Nani chuan, "Mangṭha tih hun ka thleng ve ta, tunah chuan professional player anga chawl turin thutlukna ka siam tawh. Hun duhawm tak ka tawng a, tun dinhmun ka thlen theihna atana min puitu zawng zawngte chungah lawmthu ka sawi.

"Kum 20 chuang football ka khelh chhungin hun hrehawm deuh tawn changte nei mah ila, min puitute zarah theihnghilh theih loh tura hun duhawm ṭhahnem tak ka tawng a ni. Tuna chuan football zin kawng ka khar ta a, zing kawr thawr zawh turin ka rilru ka siamfel tawh e," tiin a sawi.

Portuguese winger ball thiam Nani hian June 2007 khan £21mtd-in Man United a zawm a, English club tan match 230 khelin goal 41 a khungsak. Old Trafford-ah hun duhawm tak a hmang a, season khatnaah Champions League nomawi chawi nghalin season riat chhungin Premier League nomawi vawi li a chawi bakah League Cup vawi hnih a chawi bawk.

Man Untied tana Nani khelh ṭhat ber ṭum chu 2010-11 season kha a ni a, hemi season hian club-a a khelhpuiten player of the year atan an thlang a, PFA Premier League team of the year-a a tel bakah league-ah assist ngah berin vawi 14 a nei a ni.

English club aṭangin loan hmangin 2014-15 season khan Sporting Lisbon a zawm a, hemi zawh hian a nghetin Fenerbache a zawm. Nani hian Valencia, Lazio, Sporting a third time, Orlando City, Venezia, Melbourne Victory leh Adana Demirspor tan a khel a, a tawp khar nan an khaw club Estrela Amadora-ah a khel a ni.

Nani hian ram Portugal tan match 112 khelin goal 24 a khung a, Euro 2016 champion ṭum khan player pawimawh a ni pha bawk.