Thih leh dam kara leng Real Madrid

Team 36 inelna Champions League-ah champion lai Real Madrid chu 24-na an ni a, tuna an awmnaah hian league stage hi khar ta se, knockout playoff an khel pha chiah chiah ang a, mahse, seeded pawh an ni phak lo ang.

Real dinhmun a him lo a, direct-a last 16 luh a har tawh dawn a, tla thei dinhmunah an ding bawk! Season hmasaa champion nomawi chawitu team tan league round-a tlak nghal hi mualphona tawpkhawk a ni dawn a, insiamrem an mamawh.

Mahse, a harsa dawn - zanin dar 1:30-a an hmachhawn tur hi Atalanta an ni a, Europa League champion hian season ṭha tak an hmang mek. I awih loh chuan hrilhfiah tur chein Serie A table leh Champions League table a awm.

Atalanta hian Serie A table chung ber an luah mek a, Champions League match nga an khelh tawhah an la tlawm lo bawk - match thum an chak a, match hnih an draw.

Real beiseina

Spanish champion Real hian tun season-ah tluk leh din an fawm a ni ber - La Liga lamah pawh Barcelona chetsual chhoh zarzoin nomawi beiseina thar an nei ve leh mek a, mahse, a nihna takah chuan an duh ang takin tun season-ah an la khel lo.

Champions League-ah pawh match nga an khelh tawhah vawi thum ngawt an tlawm a, vawi hnih chiah an la chak! Real-in 2-0 a Liverpool an ngam loh hi kan hrethiam dawn a nih pawhin Lille (1-0) leh AC Milan (3-1) laka an tlawm erawh insawifiah an ngai!

Real fixture hmasa lam hi a harsa lo, tia sawi theih a ni a, a tawp khawkah anmahni leh anmahni hna hautak an insiam a ni ber - zaninah an ṭhat dan berin an la khel thei lo zui.

Player inhliam vangin tlarhnung an talbuai takzet a, hetiang kara goal khung thiam Atalanta hmachhawn hi thil châkawm a ni lo - an league match hnuhnung berah pawh Antonio Rudiger leh Aurélien Tchouaméni te tlarhnung laiah an inkawp.

An tho ang em?

Tun season-a Real talbuaina langsar chu tlarhnung a ni a, an hmachhawn tur Atalanta lakah fimkhur a ṭul dawn. Serie A club hian league match 15-ah goal 38 ngawt an khung tawh a, UCL-ah pawh goal 11 khungin, an lamah goal khat chiah a lut.

Real tana chanchin lawmawm chu Jude Bellingham a 'form' leh ta hi a ni a, a league match hnuhnung pangaah English midfielder hian goal a khung vek! Match hnuhnung berah hliam vanga lakchhuah ni mah se, tunah chuan a inlan leh thei tawh.

Madrid khaw club ṭantute lawmna tizual turin Vinicius Junior leh Rodrygo Goes te chu squad-ah telh an ni a, hliam vanga chawl reng player pahnih hian bul an ṭan lo a nih pawhin bench aṭangin an lut thei tawh dawn niin a lang.

Kylian Mbappe-a'n tun season-ah sawisel hlawh mah se, a league match hnuhnung berah goal a khung a, French striker hian inrintawkna neih belh turin Atalanta lakah khung belh a tum dawn.

Bayern inlan hun

Zanina club lian inlan tur zingah Bayern Munich chuan Shakhtar Donetsk an hmachhawn dawn a, Ukrainian club hian ram buai avangin an 'home match' hi Germany-ah an khel dawn a, Bayern tan chuan duhthusam a ni!

German club hian UCL-ah beisei an phak bik lo. Match nga khelh tawhah vawi hnih an tlawm a, table-ah 13-na dinhmun luah ṭawkin, Real aia an sanna hi point thum chauh a ni a, vawi khat chetsualah engkim inthlak danglam thei a la ni tih a chiang.

Paris Saint-Germain-in zanin dar 1:30-ah RB Salzburg an lenchilh dawn a, French club hian point li chiah an la nei - Austrian club lakah an chak zo lo a nih chuan knockout beiseina a tlem khawp ang.

Inkhel en châkawm zingah Bayer Leverkusen-in zan dar 1:30-ah Inter Milan an mikhual dawn. Inter hi table-ah pahnihna ni mekin an la tlawm lo a, Leverkusen erawh match khat an tlawm tawh thung.