Liverpool-in Salah contract an zawrh

Mohamed Salah-a'n tun hnaiah Liverpool-in contract thar an zawrh loh thu a sawi fo a, mahse, khawthlang media rintlak ṭhenkhat chuan Salah hi Reds chuan contract thar an zawrh niin an sawi a, kum hnih dang an hnena cham chhunzawm turin an sawm.

Salah hi kum 32 mi a ni ve tawh a, Reds-ah hian kar khatah £350,000 a hlawh mek a, Liverpool chanchina player hlawh hnem ber a ni mek. A kum tam tawh leh hlawh tam lutuk hi Liverpool-in contract an zawrh lawk loh chhan nia sawi a ni a, tunah chuan an zawrh ta.

Egyptian forward hian nipuiah Liverpool-a a contract neih lai hi a hmang zo tawh dawn a, a duh chuan January-ah club dang inbiakna neihpui turin a zalen tawh. Merseyside club hian chhuah em chu an ngam lo niin a lang a, tunah an thlem mek.

Salah hian tun season inelna hrang hrangah match 21 khel tawhin goal 15 a khung a, assist vawi 12 a nei bawk. Salah bakah hian captain Virgil van Dijk leh club chherchhuah Trent Alexander-Arnold te chu an contract a zo tawh dawn bawk a, anni pahnih pawh hi Reds hian contract thar an zawrh.

Player pathum hi chhuak vek ta se, an hmun ruak hnawhkhah hi thil harsa a ni dawn tih a chiang a, Liverpool-in chelh hram an tum ang. He thu buatsaih a nih lai hian contract zawrh chungchangah eng thutlukna nge awm hriat a la ni lo.

Liverpool hian kartawpah khan league match khelh tur nei mah se, thlipui tleh thei dinhmuna a din avangin Everton nena an inkhel tur chu sawn a ni a, zanin dar 11:15 hian Champions League-ah Girona an lenchilh ang.

Reds hian Premier League-ah hmahruaiin, team 36 inelna Champions League-ah pawh hmahruaitu an ni a, match nga an khelh tawhah la chak vekin, knockout playoff an khel dawn tih chiang tawh awmchhun an ni a, mahse, direct-a round of 16 luh beiseiin zaninah pawh chak an tum dawn.