Nistelrooy tan Vardy

Nakkum January 11 khian Jamie Vardy-a'n kum 38 a tling dawn a, English striker hi Leicester City tan a la pawimawh reng. Pathianni zan khan Foxes-in Brighton an mikhual a, 2-0 a an hnufual hnuah Vardy leh Bobby De Cordova-Reid te goal hmangin siphurh an sut.

Ruud van Nistelrooy-a'n Foxes a enkawl hnuah match hnih khel tawhin tlawm an la nei lo a, West Ham 3-1 a an hneh hnuah Seagulls lakah point hlu tak an hlawh chhuak.

King Power Stadium-a inkhelah Brighton-in Tariq Lamptey leh Yankuba Minteh te hmangin goal an khung hmasa a, Foxes tan Vardy-a'n beiseina a rawn siam. English striker Vardy hian minute 86-naah De Cordova-Reid ball vawrhluh chu box chhung aṭangin goal-ah pet nghalin, keeper tan dan ngaihna a awm lo.

Leicester City-in point hmuh tumin na takin an nawr zui a, injury time-ah Vardy-a'n mahni hma sial lo takin box lai lamah ball a pe let a, De Cordova-Reid-a'n siphurh sutna goal a khung.

Foxes manager Nistelrooy chuan, "Minute 90 a ni tawh chunga, rilru fim taka Bobby ball a la pe thei khan a theihna a class san zia a pholang. Amah ang player ka nei hi ka lawm," tiin Vardy a fak.