Barca leh Real thlah fal duh lotu Atletico
La Liga table chung lam inum boruak a 'hot' zel - Atletico Madrid chuan Pathianni zan khan 4-3 in Sevilla an hneh hram a, table-ah pathumna dinhmun sawh nghetin, a chung lama Barcelona leh Real Madrid an thlah fal duh lo.
Atletico-in Rodrigo De Paul hmangin goal hmahruai an khung a, Sevilla hian Dodi Lukebakio, Isaac Romero leh Juanlu Sanchez te hmanga chhangletin an chak dawn emaw an ti hman. Mahse, Antoine Griezmann leh Samuel Lino ten si phurh an sut ve leh a, 3-3 a ni.
Team pahnih hi point an insem mai dawna a lan hnuah Griezmann a inlar a, French forward hian hun pek belhah chakna goal a khung. Atletico an chak a, point thum hlu tak an hlawh chhuak.
La Liga table chung berah Barcelona an awm a, Atletico hian point thum chiahin an phak lo tawh. Mahse, Diego Simeone-a naute hian match khatin an khel tlem zawk a, khelh zat inangah pahnihna Real chu point khat chiahin an phak lo bawk.
An vul hmasa
Atletico-in an khelmualah nung takin inkhel bul an ṭan a, Griezmann chuan goal hmahruai an khung hmain crossbar a pet per fel der tawh - minute 10-na a ni a, Rodrigo De Paul inlar hun a thleng.
Argentine midfielder hian penalty box pawn chiah aṭangin kawh zetin goal chung kil sirah a thlawh lut a, 1-0 a ni fel der. Mahse, Sevilla-in an mikhualna ramah inthlahrun an tum lo a, si phurh an sut hma.
Minute hnih hnu lawkah Dodi Lukebakio chuan si phurh a sut a, minute 32-naah Isaac Romero chuan counter-attack rang lutuk chhawr ṭangkaiin, an goal hnihna leh hmahruaina goal a khung zui a, 2-1 a ni.
Chawlhlawk hman hmain Julian Alvarez-a'n si phurh a sut leh hmanah a inngai a, mahse, De Paul-a siamsak a khung hi goal luh hmaa offside a awm avangin pawmsak an ni lo a, hnufual chungin chawlhlawk an hmang.
Chhandamtu Griezmann
Second half-ah pawh Sevilla bawkin goal khung hmasain, Julian Sanchez chuan minute 57-naah a khung. Mahse, Atletico-in Sevilla neih ve loh an nei a, a hming chu Griezmann a ni.
French forward hian minute 62-naah si phurh sut ṭhenin, a team tan beiseina a siamsak a, hetah hian a la tawp mai lo. Bench aṭanga luhtir Samuel Lino chuan hla tak aṭanga Sevilla keeper Alvaro Fernandez repin, si phurh sut zawhna goal a khung.
Hun pek belhah Griezmann inlar zuiin, chakna goal a khung zui a, Sevilla tan chhanletna hun a awm tawh lo - kum 33 mi Griezmann hian tun season inelna hrang hrangah match 22 khela goal kua khung tawhin, assist vawi ruk a nei bawk.
Atletico boss Diego Simeone chuan, "He club tan hian a theihna zawng zanwg a hlan ṭhin a ni," tiin a player chu a fak a, Griezmann chuan, "Kan telnaah chuan nomawi chawi zel kan tum dawn. Hun harsa tawn chang chu a awm ngei ang a, mahse, theihtawp kan chhuah zel ang," tiin champion a tumruh hle.