F1 intlansiak hnuhnung ber an zo

Tun season atana Formula 1 intlansiak hnuhnung ber Abu Dhabi Grand Prix chu Pathianni zan khan tlan zawh a ni a, driver champion ni chiang tawh Max Verstappen chu paruknaah a thleng.

Yas Marina Circuit-a intlansiakah hian Lando Norris chu pakhatna a ni a, hnehna an chan avangin McLaren chuan team championship lamah point 666 an hmu a, kum 26 hnua a vawi khat nan an chungnung ber.

Driver champion nei mah se Red Bull team chuan point 652 an hmu thung a, an driver pakhat zawk Sergio Perez-a'n season a hman ṭhat loh an tuar, intlansiak hnuhnung berah pawh hian a tlan tluan ve thei lo a ni.

Abu Dhabi Grand Prix-a pakhatna Norris chuan, "Season ka khar dan chu duhthusam a ni, zinkawng thui leh nuam tak kan zawh a, a tawpah team champion kan ni thei bawk.

"McLaren hian kum 26 chhung chu team champion nihna a luah lo tih hriat phei chuan a hlu zual a, kumina kan sulhnu hian season thar atan beiseina nasa tak min siamsak nghal a ni," tiin a sawi.

Season tir lamah Red Bull leh Max-a an tlan fawr hle a, mahse season chawhnu lamah erawh Norris leh McLaren an tho chhuak a, inelna hmuhnawm an lantir, season tharah pawh an inel chhunzawm ngei ang.

Driver champion Verstappen tan intlansiak hnuhnung bera hnehna chan kher a pawimawh tawh lo a, a zawna a vawi li nan a champion tawh avangin ṭha taka tlan zawh theih kha a tan a tawk, a mamawh ang point a nei tawh a ni.

Abu Dhabi Grand Prix hi Lewis Hamilton-a'n a team hlun Mercedes tana intlansiak a hmachhawn hnuhnung ber a ni nghal bawk a, world champion vawi sarih ni tawh hi season thar aṭang chuan Ferrari driver a ni tawh ang.

Car intlansiakna season a zo a, thlasik chawlh an hmang chhunzawm ang. Kum 2025 season-ah chuan intlansiak 24 awm tura ruahman a ni a, inelna hmasa ber atan nakkum March 16 hian Albert Park Circuit, Melbourne-ah Australian Grand Prix an tlan dawn a ni.