Thla nga hnuah Ashworth-a'n United a chhuahsan

Manchester United sporting director Dan Ashworth chuan thla nga lek a hna a chelh hnuah Old Trafford a chhuahsan. Ashworth hian July 1, 2024 aṭang khan a hna a ṭan a, Man United-in an muala Nottingham 3-2 a an hneh loh zawh khan a chhuah tur thu hi an tichiang.

Man United chuan, "Inhriatthiam tawnnain thutlukna hi siam a ni. Club tana hun inthlak thleng laia Dan-a hnathawh leh a thlawpna avangin lawmthu kan sawi a, a hmalam hun atan duhsakna kan hlan bawk," tiin thuchhuah an siam.

Tun season-ah Man United an chefuh thei lo a, khelmual chhungah chauh ni loin khelmual pawna an thutlukna pawh a fuh chuang lo. Season ṭan hmain Erik Ten Hag cham turin thutlukna an siam a, Premier League match kuaah vawi thum chauh a chak avangin October thlaah an ban.

Ten Hag leh a staff-te zângnadawmna atan hian United-in £10.4mtd an seng a, Ruben Amorim-a lalut turin release clause atan £11mtd an pe leh bawk.

Man United-in June 30, 2024-a an sum dinhmun an puanzar khan £113.2mtd an hloh a, kum nga chhunga an sum hloh hi £370mtd aiin a tam zawk a ni.