Napoli an chak lo

Serie A hmahruaitu ni ṭhin Napoli chu Pathianni zan khan an mikhual Lazio lakah 1-0 in an chak lo a, Antonio Conte naute hian Italian league sang bera hmahruaitu an nihna chu an hloh zui nghal.

An elpui Atalanta an chak tih hresain Napoli an inlan a, mahse Diego Maradona Stadium-a inkhelah Naples club hian goal an khung thei lo a, mikhual lamin hun tawp dawn lamah Gustav Isaksen hmanga khungin goal dang a lut zui lo.

Napoli coach Conte chuan, "Tuna kan match hian kan nihna a pholang a, tun hnaiah kawng dik kan zawh tawk lo tih chu a takin a rawn lang ta a ni. Khingpuite goal bula kan talbuai tlat chuan thil a harsa ṭhin," a ti.

Tun season Serie A bikah Napoli hi an tlawm vawi thumna a ni. Lazio hma hian Hellas Verona (3-0) leh Atalanta (3-0) te an ngam lo bawk a, champion tur chuan insiamṭhat ngai lai an la nei tih a chiang.

Italian manager Conte chuan sawi zawmin, "Ka naute khelh danah ka lungawi loin ka lawm lo hle tihna erawh a ni lo, khelmual chhungah khan theihtawp chhuahin hnehna chan tumin an bei tih ka hmu.

"Rang taka insiamṭha in kawng dik kan zawh leh nghal ang. Lazio kha Serie A chauh ni loin Europe lamah pawh team ṭha an ni," tiin an khingpui chuan chak an phu tih a sawi.