Nadal-a lal ram thiattu Djokovic

Novak Djokovic chuan quarterfinal-ah champion lai Rafael Nadal hnehin French Open-a Nadal hneh thei pahnihna a ni ta. Kum 2009 fourth round-ah Robin Soderling-a'n Nadal hi a lo hneh tawh bawk. A lalram aṭangin Nadal paih chhuahin a awm ta.

French Open-ah bik hi chuan Nadal hi hneh theih loh ang hial a ngaih a ni a, kum 11 chhungin vawi kua a champion tawh. Match 72 a khelh tawh aṭangin vawi hnih chiah chak loh a la nei a ni.

Djokovic hian inkhel bul a ṭan ṭha takzet a, game hmasa pali ala fai vek. Mahse, Nadal rawn ṭang let ve lehin game nga la ve mah se Djokovic hian 7-5 in set hmasa ber a la ta tho. Set khatnaah hian Djokovic-a'n set point vawi thum ngawt a hmang ṭangkai lo.

Grand Slam-ah chuan set nga aṭanga chak zawk zawn a nih ṭhin avangin Nadal leh Djokovic te hian set nga an khel ngei tura ngaih a ni. Set hmasa berah pawh an inbeih tawk em avangin inkhel hautak tak a ni leh ngei dawnin a lang hman.

Amaherawhchu, beisei angin thil a kal lo, World Number 1 Djokovic-a'n set hnihna leh set thumnaah harsatna a tawk lo a, 7-5, 6-3, 6-1 in hnehna a chang.

Eng nge an sawi?

Kum 29-a upa Nadal chuan, "Kum 2009 khan he hmunah hian ka chak lo tawh. Mahse kha kha a tawpna a ni lo. Tunah ka chak lo leh ta, hei pawh hi a tawpna a ni lo ang. Nakumah helai hmunah hian ka lo kir leh ngei ang. Novak kha kei aiin a ṭha zawk a, chak a phu a ni," tiin a sawi.

Seeded pakhatna Djokovic chuan, "Ka inkhelh tawhah chuan ka theihnghilh tawh loh turte zing ami a ni tawh ang. Nadal hneh hi thil awlsam a ni lo a, abik takin French Open-a hneh hi chu a ropui bik hle a ni," tiin a sawi. Djokovic hi Grand Slam dang zawng zawngah champion vek tawh mah se French Open-ah ala champion lo.

Inkhel dangah Andy Murray chuan inkhel inhnehtawk takah 7-6, 6-2, 5-7, 6-1 a David Ferrer hnehin semifinal a in vaw tling ve bawk. Final lut turin Djokovic nen an inhmachhawn leh ang.

Hmeichhe lamah seeded pakhatna Serena Williams leh Timea Bacsinszky te chuan semifinal an lut ve bawk. Kum 2001 a Martina Hingis-i'n semifinal a luh hnuah Bacsinszky hi Swiss mi hetiang thleng leh thei hmasa ber a ni.

Bacsinszky hian final luh a duh a nih chuan a vawi 20 nana Grand Slam champion nih leh tum Williams a hneh a ṭul dawn a ni.