Messi hi mihring pawh a ni lo - Buffon

June 6, Inrinni zan khian Barcelona leh Juventus ten Champions League final an khel tawh dawn. Italian club player-ten Barca thiampuipa Lionel Messi an in fak siak a ni deuh ber.

Kum 37-a upa Juve keeper Gianluigi Buffon chuan, "Messi hi chu mi­hring pawh a ni lo, planet dang aṭanga football khel tur hrim hrima lo kal ang mai a ni. June 6-a kan inhmachhawn huna ka beisei san ber chu mihring te ang thoa a inkhelh ve a ni," tiin Messi thiam dan chu planet hran daih ami ang mai nia a hriat thu a sawi.

Messi hian tun sea­son-ah Barcelona tan goal 58 a khung tawh a, Brazil captain Neymar leh Uruguay striker Luis Suarez te nena tun sea­son-a an goal khung zat chu goal 120 a tling tawh.

Italy tana vawi 147 lai inlan tawh Buffon chuan, "Ka ngaihdanah chuan khawvela player pathum inkawp ṭha ber an ni. An thiamna leh theihna te enin dan an harsa em em. Keini pawhin theihna kan nei ve a, kan dang thei lo a nih pawn tih­buai dan tal chu kan ngaih­tuah thei a ni," tiin champion tur chuan an fim­­khur a pawimawh thu a sawi.

Juventus hi kum 1996 hnuah Champions League-ah an la champion leh miah lo a, Barcelona erawh kum 2011 khan champion thung. Finalist te hi treble champion thei dinhmunah an ding.