Benitez-a'n kum thum a daih ang em?

Real Madrid-in May 31, 2010-a Jose Mourinho an lak luh khan kum li daih contract an ziah pui a, kum hnih hnuah kum 2016 thleng daih turin contract pawtsei mah se kum 2013 nipuiah Portuguese manager contract hi tihtawp a ni.

President Florentino Perez hnuaiah kum 12 chhungin manager 10 an nei a, manager thar Rafael Benitez hi 10-na a ni. Spanish manager hian kum thum daih contract a ziak a, a contract a hman zawh theih chuan coach hlawhtling tak a ni ngei ang.

Hun bi thar

President Perez chuan, "History aṭanga thlir chuan kan duh ang coach hi kan la hmu lo a ni. Vawiin hi Real Madrid tan hun bi thar a ni. Coach thar kan neih chhan hi hun ṭha zawk kan duh vang a ni. Rafa Benitez - Real-ah kan lo lawm a che," tiin manager thar tlangzarh ṭumin a sawi.

Rafa chungchang sawi zuiin president chuan, "Rafa hi football-a chawm len a ni a, a naupan lai aṭangin he hun hi a beisei a, a nghak chhuak ta. A hming tluk pui chu thawhrimna, theihtawp chhuahna leh beiseina te a ni," tiin manager thar a fak.

President ṭawngkam thlum hi result ṭhain a chhunzawm loh chuan Rafa hmabak chu ban a ni. Liverpool manager hlui hian 'kum thum a daih ang em?

Rafa thukhawchang

Bernabeu presidential box-ah Rafael Benitez-a mittui a tla a, lawm vang a ni. Spanish manager chuan, "Ka club enkawl tawha player ka neih ṭhat ber ṭum a ni. Defensive game khel ṭhin angin min sawi a, amaherawhchu Napoli season hnih ka enkawl chhung khan goal khung tam lamah record kan siam ve ve. Real-ah player an ṭhat avangin kan attack ang a, goal kan khung ang a, kan chak ang," tiin attacking football a khelh tur thu a sawi.

Real chuan goal chu an khung mai ang, mahse goal an chhuah zel chuan champion a har dawn.

Keeper thar?

Jose Mourinho-a'n veteran keeper Iker Casillas chu bench-ah a ṭhuttir ṭhin. Carlo Ance­lotti hnuaiah Casillas a ropui lo a, 2014 World Cup-a che ṭha Keylor Navas la lut mah se Costa Rica keeper hian Spanish keeper a tluk lo.

Real no. 1 Casillas hian season tawp lamah chiang tak taka tihsual a ngah hle. Hei vang hian Spanish club lian hian Manchester United player of the season David de Gea lak luh an tum.

Casillas chuan, "De Gea lut mah se Real chhuahsan ka tum lo. Khelhna hmun ka chuh ang. Italian keeper Buffon iangin hun rei tak khelh ka la tum," tiin chhuah a tum lo.

Benitez hna hmasa ber chu keeper tur chinfel a ni ang. Spanish manager chuan, "Ka team chhunga player zawng zawng hian theihna sang tak an nei a, mimal chanchin sawi ka tum lo," tiin Casillas chungchanga zawhna a chhang.

Dressing room boruak

Real Madrid dressing room boruak hi mi nawlpui rin phak bak a ni. Kum 1999 khan Real Madrid-in Arsenal aṭangin Nicholas Anelka an la lut a, beisei a pha lo.

French forward hian Real-a chetchhiat chhan Four Four Two-in kum 2008-a a kawm ṭumin a sawi chhuak. Anelka chuan, "Real ka zawm tirh khan locker (almara) ka nei lo. Samuel Eto’o leh Geremi te chuan min hrilh ru a, anni chuan, "Senior player ṭhenkhatin Fernando Morientes awm reng laia an la lut che hi an hrethiam lo a, player ṭhenkhatin president an hmu mek. Fimkhur ang che," tiin min hrilh a. Khami hnu kha chuan ngai ka awh leh thei tawh lo," tiin a sawi.

Anelka tawn ang hi chu a awm tawh kher lo ang. Amaherawhchu Benitez enkawl tur hi Cristiano Ronaldo, Gareth Bale, Toni Kroos, Karim Benzema leh James Rodriguez te an ni a, player dangte an nep lo. Heng player tih lungawi vek chu a har khawp ang.

Ronaldo a pawimawh

Player manto ber ni tawh lo mah se Portugal captain Cristiano Ronaldo hi Real player pawimawh ber a la ni reng. Tun season-ah goal 61 tehmeuh a khung a, goal khung lama Lionel Messi tluk loh awmchhun a ni.

Ronaldo hian goal 61 aṭanga goal nga chauh hi box pawn aṭanga a khung a ni a, Benitez hian result ṭha nei turin Manchester United winger hlui hi a hman thiam a ṭul dawn a ni.

Fans leh Media tih lungawi

Ancelotti chhuah dawn khan poll lak a ni a, Italian manager duhtu hi Real fan zingah 44% zet an la awm. Chumai a ni lo, Ancelotti dawta an duh chu Jurgen Klopp leh Olympiacos coach hlui Michel te an ni. Real manager thar Rafa duhtu chu 8% chiah an awm.

Spanish chanchinbu lian Marca chuan Real-in Rafa Benitez an lak luh hlauawm theih chhan point 18 chu headline hnuaiah an ziak kulh. An supporter-te pawh hi duh dan nei an ni a, club tana rinawm Casillas an au nawm nah hreh lo a, Gareth Bale pawh Ronaldo a pass loh vangin ringawtin an sawisel bawk.

Rafael Benitez-a'n football a zirchhuahna enkawl turin Spain a kir a, a hmabak hi a hautak hle.