Newcastle boss thar tur McClaren
Premier League club Newcastle United chuan season thar aṭanga an manager turin Steve McClaren an dawr fel thawkhat tawh a, English manager hian kar leh lamah contract a ziak fel thei tura ngaih a ni.
May thlaa Championship club Derby County-in an ban tak McClaren-a'n contract a la sign loh chhan pawh hi inbiak remna tur an nei lam ni loin, England manager hlui hian chhungkuaa chawlh a hman mek vang a ni.
Dutch league lama FC Twente lo champion pui tawhtu hian Magpies ho sawmna hi vawi hnih lai lo hnar tawhin nikum December thlaa Alan Pardew an ban khan a lo hnar fithla ṭhak tawh a, season tawp lama match thum chhung enkawl tura an sawmna pawh a lo hnar tawh bawk.
Pardew ban a nih vanga coach lailawk hna chelhtu John Carver chuan season tharah pawh Newcastle enkawl zela duh thu sawi mah se McClaren hian a rawn nekchhuak dawn ta a ni.
Kum 50-a upa Carver hi coaching staff zingah la tel tho tura ngaih a ni.
League Cup-a Middlesbrough lo champion pui tawhtu Mc Claren bakah hian Newcastle chuan Arsenal captain hlui Patrick Vieira an lo be tawh a, mah se French midfielder leh club hruaitute player lakluh tum dan a inmil loh avangin an lo in ṭha ṭhen tawh a ni.