Torres an fak uchuak - Casillas
Jerzy Dudek-a'n Champions League-a Liverpool a champion pui hnuah Real Madrid a zawm a, Polish keeper hian a chanchin ziahna lehkhabuah Spanish football-a a hun tawn a ziak. Player leh coach ṭhenkhat tan hriat a nuam kher lo ang.
Torres chungchang
January 2011 khan Chelsea-in Liverpool aṭangin Fernando Torres chu pound maktaduai 50-in an la lut a, hemi chungchanga Spanish keeper Iker Casillas thusawi hi Torres tan chuan a ngeiawm ve khawp ang.
Dudek chuan, "Torres hi Spanish football-a a thiamna baka fak uchuak ber a ni," tiin Casillas-a thusawi a ziak.
Polish keeper hi kum 2007 aṭanga 2011 chhung khan Real-ah Casillas-a thachhang dawltu a ni.
Ronaldo a bang lo
Dudek chuan Real goal khung khawl pahnih chungchang ziak telin, "Raul leh Cristiano Ronaldo te hi mahni indah pawimawh tak an ni a, 5-0 a chaka goal an khung loh ai chuan goal khunga 2-1 a chak an duh zawk," tiin team aia mahni an indah pawimawh thu a ziak.
Madrid-in Lyon an hneh loh ṭuma thil thleng a ziak tel a, Ronaldo-a'n training session-a naupang autograph a ziah sak loh chungchang ziak tel. Dudek chuan a ziah sak loh chhan a zawh chuan Ronaldo chuan, "Madrid-ah hian chak turin ka kal a, autograph ziak tur ka ni lo," tia a chhang thu a ziak tel bawk.
Mourinho a thinrim
Real Madrid-in Barcelona an hmachhawn dawn ṭumin Jose Mourinho-a'n defensive midfield-ah Pepe hman a thum a, media lamin lo hriain Portuguese coach chu a thinrim hle.
Hemi chungchang hi Dudek chuan,"Pepe midfield-a chhawr a tum thu media lamin an rawn hriat hman avangin thinrim zetin dressing room-ah a rawn lut a. "Tunge ṭawng tam? Granero nangmah ami?" tiin rinhlelh a rawn nei nghal a, game plan tichhuaktu a hriat hma chu a zawn char char tur thu a sawi hnuin thinrim takin room a chhuahsan," tiin a ziak.
Esteban Granero hi Madrid-a piang a ni a, midfielder niin tunah chuan Real Sociedad tan a khel tawh.
Messi & co
Polish keeper chuan Real Madrid hmelma Barca chungchang sawiin, "Guardiola enkawl Barcelona khan team dang tih thinrim an thiam takzet. Lionel Messi hi player fel tak angin lang mah se Pepe leh (Sergio) Ramos te chunga a ṭawngkam hman duh dan chu mak tak a ni," tiin field chhungah Argentine forward nungchang chu rin phak bak a nih thu a sawi.