A vawi khat nana Grand Slam final khel tur Safarova

Czechoslovakia tennis player Lucie Safarova chuan a vawi khat nan Grans Slam final a lut ta. Kum 34 hnua Czech hmeichhia in French Open final an luh lehna hmasa ber a ni. Kum 1981 daih tawh khan Czech mi Hana Mandlikova-i chu a lo champion tawh.

Hmeichhe semifinal inkhel­ah Safarova hian a khingpui Ana Ivanovic chu darkar khat leh minute 52 chhungin 7-5, 7-5 a hnehin a chen na ngai loh ram a in vaw thleng . Final-ah hian World number 1 Serena Williams nen an inhmachhawn ang.

Seeded 13 na Safarova hian inkhel bul a ṭan ṭha lo hle a, set khatnaah hian Ivanovic-i'n 5-2 in hma a hruai hman. Mahse, kum 2008 champion Serbian star Ivanovic hi hun pawimawhah a chet sual fo avangin set khat mah a la ta lo zawk a ni.

Kum 28-a upa Safarova chuan final a lut chu mak a tih thu sawiin, "A mak a ni. Mahse, a tak a ni si. Tunah chuan ka lo suangtuah ve ṭhin kha ka thleng ve mek, inkhel bul ka ṭan ṭha loin ka service ka hman ṭangkai mai theih loh avang khan ka talbuai hman hle. Mahse mak tak maiin hmasawn ve hret hretin final ka thleng ve ta reng mai. Ka duh leh beisei ber erawh ka la thlen loh avangin champion ngei turin ka bei zui ang," tiin a sawi.

A vawi li nana Grand Slam khelh tum, mahse thleng zo ta lo Ivanovic chuan, "Nidang ang bawkin bul ka ṭan ṭha a, chak ngei pawh ka inbeisein ka inring hman bawk. Ka vanduai ni a nih bakah Safarova khan a khelh ṭhat em avangin ka tum ram ka thleng zo ta lo hi a pawi ka ti," a ti.

French khawlum vangin Serena Williams-i'n beisei angin a khel chhuak zo lo a, mahse final lut turin dang zo an la awm chuang lo. Set khatna a hloh zet hnuah game hnuhnung 10 chu la fai vekin Timea Bacsinszky chu 4-6, 6-3, 6-0 in a hneh.

American Williams chuan inkhelh harsa a tih thu sawiin, "Third round kan khelh zawh aṭang khan khawsikin min ṭham ṭan a, tun thlengin min la thlah lo. Bacsinszky nen kan inkhelh dawn pawh khan ka la nawmsam loh avangin chak pawh ka inbeisei ngam lo. Set thumna kan khelh dawn phei kha chuan ka chau tawh takzet a, mahse rin phak bakin thil a kal a, ka vannei a ni," tiin a sawi.

A vawi thum nana French Open cham­pion nih tum Williams hi hmeichhe zingah Grand Slam champion tam ber niin vawi 19 a champion tawh. Kum 33-a upa ni tawh mah se a tharum ngah leh tumruh vangin ṭhangthar zingah amah el phak an la awm meuh lo a ni.

Nimin tlai khan Mipa semifinal khelh niin World number 1 Novak Djokovic leh Britain Andy Murray te an inkhel a, semi­final lehlamah khawtual tlangval Jo-Wilfried Tsonga leh Roger Federer hnehtu Stan Wawrinka te an inkhel bawk. Result erawh kan hre hman ta lo. Pathianni khian mipa final khelh bawk tur a ni ang.