Cavs tan James chet ṭhat a tawk lo
Zirtawpni zing khan NBA final game 1 khelh a ni a, overtime-a chungnung Golden State Warriors-in Cleveland Cavaliers 108-100 in an hneh.
Oracle Arena-ah mikhual Cavaliers-in bul an ṭha a, second quarter-ah Warriors an rawn chet ṭhat zui avangin team pahnih hian fal lai an nei lo a, an in lehpelh chhawk zak zak.
NBA MVP Stephen Curry-a'n second tlem-te chauh a awm tawh tihin a layup a, mak takin Cavs point guard Kyrie Irving-a'n ṭha zetin a block sak. Point 44 zet score-tu Cavs star James-a'n chakna hun ṭha an neih chu a hlah avangin overtime khelh a ṭul phah.
Overtime-ah James-a'n a shot hmasa pathum a hlah vek a, Irving a inhliam zui bawk avangin Cavaliers-in ngai an awh tawh lo. Hun a tawp chuan Golden State Warriors 108-100 in an chak.
Warriors-in bench an neih ṭhat an hmang ṭangkai a, an bench player-te'n point 34 zet an score a, Cavs bench-in point kua lek an nei thung. Point 26 score-tu Warriors guard Curry-a'n thun tam lamah James pha lo mah se team chakna kawngah a pawimawh hle.
Thawhṭanni khian Oracle Arena-ah NBA final game 2 khelh a ni ang.