UCL Final kan nghak chhuak ta

Zanin dar 12:15 hian UEFA Champions League final-ah Juventus leh Barcelona an inkhel dawn a, football ngainatute tan men rei zan a ni.

Hei le! MSN

Barcelona innghahna Lionel Messi (Pld:56, 58 Goals, 27 assists), Luis Suarez (Pld:42, 24 Goals, 21 assists)leh Neymar (Pld:50, 38 Goals, 7 assists)-te record hi a chhuanawm hle.

Barcelona-in tun season Champions League-ah goal 28 an khung a, goal 25 hi tlar hma pathum MSN hming lem an vuahte khung a ni.

Barca-in PSG leh Bayern Munich an hneh ṭumin goal 10 an khung a, player pathum khung vek a ni. Brazil captain Neymar-a'n match hnuhnung pathumah goal a khung vek a, goal luhna kawngah Messi leh Suarez te an inrawlh vek bawk.

South American trio ten tun season-a goal an khung tawh zat chu 120 an ni a, European club zingah anni aia khung tam chu Real Madrid (162 Goals), Bayern Munich (123) leh PSG (122) te chiah an awm. Final-a an khingpui tur Juventus player zawng zawng goal khung zat belhkhawm chu 103 a ni.

Juve ve thung

Barca-in tlar hma an chhuan laiin Juventus midfield ṭhat zia hmuh hmaih a thiang lo. Italian champion hian kum 36-a upa Andrea Pirlo bakah Paul Pogba, Arturo Vidal leh Claudio Marchisio te an nei a, an midfield hi team innghahna an ni.

Tlar hmaah Carlos Tevez a che ṭha a, Argentine forward hian nikum khan UCL-ah goal khatmah a khung lo. Tun season-ah erawh Manchester United player hlui hian vawi 34 shot-ah goal sarih a khung. Real Madrid lama goal pawimawh khungtu Alvaro Morata-a'n vawi 22 shot-ah goal li a khung.

Italian club larna ber erawh tlar hnung a ni a, Juventus-in awmze nei taka Barcelona attack na tak dan an tum tur hi khawvel hmuh châk chu a ni.