FIFA buaina a zual zel

Khawvela football thuneitu sang ber FIFA chhungkaw buainain ziaawm lam a pan thei lo. Eiruk thubuai vangin hruaitu ṭhenkhat man an ni a, president Sepp Blatter-a'n a ban thu a puang hial.

A hnu lawkah New York court-in CONCACAF general secretary Chuck Blazer-a inpuanna an tichhuak ve leh a, a la tawp mai chuang lo. Nimin khan Football Association of Ireland chief executive John Delaney a inpuang ve leh ta. FIFA buaina hian zual lam a la pan dawn chauh niin a lang.

FAI chief executive John Delaney chuan kum 2009 World Cup play-off-a Thierry Henry handball chungchang sawi chhuakin FIFA an khinna chu FIFA-in hnuhdawh tirin an hnuhdawh manah hian euro maktaduai 5 lai an pe niin a sawi.

Kum 2009 World Cup play off-ah Republic of Ireland leh France an inkhel a, first leg-ah 1-1 a an lo inhnehtawk tawh avangin he inkhela chak zawk zawk hian 2010 South Africa World Cup an khel dawn. Hun tawp nan minute 16 chauh a awm tawh tihin France thiampuipa Henry-a'n a fin phakar a chhuah a, goal bulah a kut hmanga ball insiamṭhain a pet a, William Gallas chuan an chakna goal ni turin a lo pet lut.

Delaney chuan, "France chak danah khan kan lungawi lo em em a, Blatter-a khawsazia khan kan lung a ti awi lo hle bawk. Mahse, a hnu lawkah FIFA chuan inbiak puiah min sawmin inremna min neihpui a, keini leh FIFA tana ṭha tur ve vein thutlukna kan siam ta a ni," tiin FIFA laka thubuai an thehluh an hnuhdawh dan chungchang a sawi.

FIFA thupuangtu chuan Delaney-a thusawi hi phain, "Ireland hnena pawisa kan pek zat hi dollar maktaduai 5 a ni. Thubuai hnuhdawh tir duh vanga pek an ni lo a, loan anga puk tir niin Ireland ram chhunga stadium sak ṭhat na turin kan hman tir mai a ni," a ti. FIFA thupuangtu chuan, "2014 World Cup-ah Ireland hi an tlin chuan pawisa hi rulh leh tura tih a ni a, an tlin tak loh avangin min rul lo chauh zawk a ni, a ti bawk.

Hetihlai hian FIFA vice-president Jim Boyce chuan, "Ireland thlem lungawi nana dollar maktaduai nga pek a lo ni reng hi ka hrethiam lo, hetiang zat pawisa thehchhuak tur hian tuin nge theihna nei? FIFA executive committee chuan a chhui chiang tur committee ruat ngei se tih hi ka duhdan a ni," a ti.