Formula 1 Canadian Grand Prix an tlan dawn
Pathianni hian motor intlansiak ngaina tute tan chuan intlansiak hmuhnawm a awm leh dawn ta, tun season-a intlansiak vawi sarihna ni turin Canadian Grand Prix an tlan leh dawn.
Kum 1961 aṭang khan Canada ramah hian motor intlansiak neih ṭan a ni a, kum 1967 aṭang khan Formula One World Championship neih chhunzawm niin tun thlengin an la chhunzawm zel a ni. Canada-ah hian motor intlansiak World Championship vawi 51 zet an nei tawh.
Circuit Gilles Villeneuve tlan kawng hi 305.270 km a thui niin lap 70 an tlan ṭhin. Nikum khan he hmunah hian Red Bull driver Daniel Ricciardo chu pakhatna a ni. Canadian Grand Prix a hnehna chang hnem ber tawh chu Michael Schumacher niin vawi sarih zet hnahna a chang tawh, team lamah chuan Ferreri leh McLaren sulhnu a inanga vawi 13 ve ve constructon-ah hnehna an chang tawh.
Tun season-ah Mercedes an chet ṭhat em avangin naktuakah pawh hian beisei awm ber an ni leh ang. Intlansiak vawi ruk awm tawh aṭangin Mercedes hian vawi nga hnehna changin Ferrari driver Sebastian Vettel chuan vawi khat hnehna a chang ve tawh bawk.
Tunhnai intlansiak hnuhnung pahnih Spanish Grand Prix leh Monaco Grand Prix a pakhatna ni thei Mercedes driver Nico Rosberg chuan, "Intlansiak kan hmachhawn dawn hian tunhma a thil lo thleng tawhte ka thlir let tel fo. He hmunah hian Ferrari an lo chet ṭhat ṭhin em avangin naktukah pawh hian kan inthlahdah thiang lo ang. Vettel hi a thiamin a fing em em a, car a neih ṭhat bawk avangin kan ngaihven ngun a ngai ang," tiin an elpui Ferrari team chungchang a sawi.
A team-mate Lewis Hamilton nena an chungchang an zawhna chhangin Rosberg chuan, "Kan inkarah boruak chhia a awm lo, team pakhat tana thawk ho kan ni a, kan inpawh tlang hle. Champion tuma inum kan nih avangin in er niloin kan inel em em zawk a ni," tiin a sawi bawk.