Champions League Final Thlirlawkna Italian Champion Vs Spanish Champion
Final fuh bik a awm a, kumin UEFA Champions League final hi season kharna atana duhthusam a ni.
Italy-ah Juventus-in ro an rel a, Spain-ah Barcelona an chungnung. Ram pahnih champion hian treble champion turin UCL nomawi chiah an mamawh tawh.
Zanin dar 12:15 hian Juventus leh Barcelona ten Olympiastadion, Berlin-ah final an khel ang.
Juve beiseina
Kum 12 hnuah Juventus-in Champions League final an lut a, kum 2010-a Jose Mourinho kaihruaina hnuaia Inter Milan-in season khata nomawi pathum an chawi hnuah treble champion an tum dawn.
Juventus hi Champions League-ah ṭum hnih an champion tawh a, an champion hnuhnun ber chu 1995-96 season kha a ni. Hemi hnu hian final vawi thum lut lehin an hlawhchham vek.
Barca beiseina
Catalan club hi ṭum li an champion tawh a, an champion hnuhnun ber chu 2011 kha niin 2009 khan treble champion an ni.
Juventus final luh hnuhnun ber leh kumin final inkarah Barcelona-in vawi thum final an lut a, nomawi an chawi vek. Luis Enrique hote hi treble champion chauha lungawi tur an ni a, rinkai zawk an ni.
MSN-ah Suarez a langsar
Barcelona attacking trio Lionel Messi, Luis Suarez leh Neymar ten tun season-ah goal 120 an khung tawh. Messi thiam zia sawi uar mah se final-ah erawh Suarez hming a langsar zawk.
Uruguayan forward hian 2014 World Cup-ah Italian defender Giorgio Chiellini a seh a, hei vang hian thla li chhung hrem a ni. Suarez hian Barcelona season ṭan tirh match 11-ah a inlan thei lo.
Final-a Suarez leh Chiellini intawng turin thawm a lian viau mah se Juve defender pawimawh hi inhliam vangin a inlan dawn lo. Uruguayan forward tan 'hnara hlit phawi' ang hlauh ni mah se Juve tlar hnungah Patrice Evra a la awm.
Suarez hian French defender hi a vun rawng vanga a diriam tawh avangin Liverpool tana a khelh lai khan match riat chhung inkhel lo tura hrem a ni. Zanin hian Suarez hian ngaihven a hlawh bik a nih pawhin a mak lo ang.
Xavi hun hnuhnung
Xavi-a'n competitive match-a Barcelona jersey a hak hnuhnun ber zan a nih dawn avangin, Spanish midfielder ngainatu tan chuan hmaih a thiang lo.
Barca-in an thlah zanah Xavi chuan, "Ka mang ṭhat ber zan pawhin tun ang dinhmun hi ka la hmu pha ngai lo, ka hlim takzet a ni. Barcelona ka chhuahsan hmain Berlin-ah nomawi chawi ngei ka duh a ni," tiin champion a tum ruh hle.
Forza Juventus
Champions League-a Juventus champion pui tawhtu Zinedine Zidane chuan, "Final-ah chuan engpawh a thleng thei a, Italian club hi an danglam lehzual. Italian club-te khelh dan hi Spanish club angin a hmuhnawm lo mah se inelna pawimawhah an ding chhuak ṭhin. Dah hniah theih a ni lo," tiin a sawi.
Real Madrid youth team coach Zidane chuan, "Turin-ah kum nga chhung ka awm a, final-a an chetṭhat theih nan duhsakna ka hlan e," tiin a club hlui chu champion tura a duh thu a sawi.
Gigi Buffon
Gianluigi Buffon hian Juventus tan kum 14 chhung a khel tawh a, keeper ropui hian Champions League nomawi a la chawi lo. Kum 2003 khan final thleng mah se AC Milan an hneh lo.
Tunah hian Buffon hi kum 37-a upa a ni tawh a, hun ṭha herchhuak nghah leh ai chuan nomawi ban phaka a awm laia chinfel mai a finthlak ang.
Allegri Vs Enrique
Juventus Massimiliano Allegri-a'n season tir khan Juventus a zawna Serie A title vawi thum lak puitu a thlak; Italian manager hian Juve hi Serie A-ah a ṭum li nan a champion pui a, kum 20 hnuah Coppa Italia-ah a champion pui a, kum 12 hnuah UCL final a thlen pui bawk.
Allegri hi AC Milan-in result ṭha neih loh vangin an ban a, Juve fan-te pawhin an club enkawl turin a tirah chuan an duh lo, hna a thawh tirhin artuiin an vawm hial.
Tata Martino hnuaiah Barcelona-in nomawi an chawi lo a, Luis Enrique-a'n Barca a enkawl kum khatnaah La Liga leh Copa del Rey-ah champion pui nghal a, UCL final a thleng bawk.
Barca midfielder hlui Enrique hian hun harsa aṭangin Catalan club hi a chhanchhuak a, season laihawl phei kha chuan result neih ṭhat tawk loh avangin ban a ni hman teuh hle.