Bolt-a record khumtu Gatlin

American sprinter Justin Gatlin chuan meter 100 intlansiakah Jamaican sprinter Usain Bolt a record lo siam tawh chu a khum.

Kum 33-a upa Gatlin hian kum 2012 a Bolt-a record lo siam tawh second 9.76 chhunga meter 100 tlan thleng hman chu Diamond League-ah khumin second 9.75 chhungin a tlan thleng a ni.

Diamond League-ah hian nikum khan Gatlin hi meter 100 intlansiakah pakhatna a lo ni tawh bawk. Kum 2012 khan Bolt hian helai hmunah hian pakhatna dinhmun a lo luah tawh a ni.

Diamond League hi IAAF Golden League thlak nana kum 2010 aṭanga neih ṭan a ni a, ram hrang hrang 20 aṭanga Athlete te inelna a ni.

August thla khian Beijing-ah World Cham­pionship a awm dawn a, chumi tur chu thlirlawkin Gatlin chuan, "Chak ngawr ngawr hi ka ngaihtuah ber lo, record lo awm tawh sa Bolt-a siam khum ringawt pawh ngaihtuah a hun rih loin ka hria. Thla khat chuang World Championship inel hmain ala awm a, chuta ṭha taka intlansiak hmachhawn tura in­puahchah chu ka tih tur zawk chu a ni rih ang," tiin a sawi.