US Open hmeichhe final Naomi Osaka vs Victoria Azarenka

Zanin dar 1:30-ah US Open hmeichhe singles final chu live ṭan a ni dawn a, a thiam ber nihna hi Naomi Osaka leh Victoria Azarenka ten an inchuh ang. Serena Williams chu a tum ram thleng zo loin semifinal-ah vuak tlak a ni thung.

Nimin zing khan Flushing Meadows, New York-ah semi-final khelh niin, champion tura rinkai Serena chu Azarenka nen darkar khat leh minute 55 an inkhelh hnuah 1-6, 6-3, 6-3 in a chak lo. Osaka chuan a khingpui Jennifer Brady lakah 7-6 (7-1), 3-6, 6-3 in hnehna a chang ve bawk.

Osaka leh Azarenka te hi inkharkhip hnua khel ṭha tluang tak an ni. US Open inbuatsaihna Western & Southern Open-ah pawh khan an pahnih hian final an lut, mahse Japan nula zawk hi hliam vangin a inhnukdawk - tournament lianah a hmawr bawktu an ni zui leh dawn tihna a ni.

Fa nei tawh, fa hrin vanga hun rei tak tennis khel thei lo - Serena leh Azarenka te hi ṭhian ṭha tak an ni. Grand Slam title 24-na beiseitu Serena hi rinkai zawk a ni a, harsa vak loin set khatna pawh a la.

US Open 2012 leh 2013 final-ah pawh Serena hian a ṭhiannu hi a lo hneh tawh, chak leh tura rinkai ni mah se thawnthu a danglam ta. Belarus star hian set khatnaah game khat chauh la mah se, set hnuhnung pahnihah break point vawi sarih a hmuh zinga pali chhawr ṭangkaiin a tlang zawk daih.

Australian Open vawi hnih champion tawh Azarenka chuan, "Hlawhtlinna chang tur chuan player ṭha ber ber hneh a ngai ṭhin, tun ṭuma ka khelh danah ka lungawi hle. Final-ah pawh hetiang bawka khelh theih ka duh," a ti. Season sarih hnuah Grand Slam final a lut ve leh chiah.

Open Era china major title la hnem ber Margaret Court (24 titles) nih rual tum Serena chuan tournament dang a nghah leh rih a ngai dawn. Inkhel tawp lamah a ke artui hliam enkawl a ngai a, hliam na tak erawh a ni lo niin a lang.

Seeded palina Naomi Osaka tan final kalkawng a awlsam lo, seeded chang phak lo Jennifer Brady-i'n a chhaih buai hneh viau. Darkar hnih leh minute riat an inkhelh huah erawh thawnhriat nei ṭha leh theihna nei sang zawk a tlang.

Osaka hian 2018 khan US Open nomawi a chawi a, thla nga hnuah Australian Open 2019 champion a ni zui leh bawk - a hunlai hian world number 1 dinhmun luah hial mah se a hnu lamah erawh beisei a phak lo, tunah a rawn tho chhuak leh mek.

Kum 22 mi Osaka chuan, "New York khawpuiah ṭha taka inkhelh hi chu a nuam a ni. He hmunah hian harsatna hrang hrang thleng thei karah ka kal a, a hmun ka thlen chinah chuan 100% rilru pe chungin ka khel thei, final atan pawh ka inringtawk hle," a ti.

Japan nula, American khua leh tui nihna nei bawk Osaka hian Drady lakah winners vawi 35 a vaw chhuak a, unforced errors vawi 17 a nei thung. A ball vuak hi player dangte anga na bik tak ni lo mah se a rilru a paukhauh a, tawnhriat ngah zawk Azarenka lakah pawh a zam lo ang.

US Open mipa singles-ah champion thar an awm ngei dawn, world number 1 Novak Djokovic a tlak hnuah chuan player la dam zingah Grand Slam nomawi hrim hrim chawi an la awm lo.

Nizan khan semfinal pahnih khelh a ni a, Pablo Carreno Busta leh seeded pangana Alexander Zverev an inhmachhawn, semifinal lehlamah Dominic Thiem leh Daniil Medvedev an inkhel thung - result kan hre hman lo.

Mipa singles final hi Pathianni zanlaiah khelh a ni dawn a, dar 1:30 aṭangin an live ṭan ang.

Kumin US Open-ah hian champion lai Rafael Nadal chu Covid-19 vangin a inlan lo a, Grand Slam vawi 20 champion tawh Roger Federer pawh hliam vangin 

a inkhel lo. Swiss star hi a khup na vangin a season a tawp tawh.