Nulaihawl champion Rohlupuii

Elizabeth Rohlupuii tan nulaihawl title a kawl lai humhim turin harsatna a awm lo - Melriat nula hian a khingpui Penticost Lawmsangpuii chu thawh ngan an inchaiah a bawhber fai vek a, atan harsatna a awm lo, 5-0 in a chak.

Hlupuii'n inchai a thunun thei viau a, a khingpui Lawmsangpuiin hian kum hnih vel chauh wrestling a la khelh avangin atan a awlsam lo. Hlupuii hian thawh nga an inchai chhungin thawh tinah vawi 10 chhiar thleng a bawhbet vek.

Thawh khatnaah ṭum hnih bawhbetin a hmasa zawkah vawi ruk chhiar a nih hnuah Sangpuii a tal chhuak a, a bet zui ta tho. Thawh hnihnaah bawhkhupin vawi thum chhiar thleng a bawhbet leh a, Sangpuii tal chhuak leh mah se a hnuah vawi 10 chhiar thleng a bet zui leh tho a ni.

Champion Hlupuii'n champion kawnghren humhimin Rs 50,000 a dawng a; pahnihna Sangpuii'n Rs 30,000 a dawng thung. Title fight bakah hian Freestyle Wrestling (Exhibition)-a inchaiten Rs 2,500 vek an dawng.

Elizabeth Rohlupuii chuan, "Ka khingpui kha akum lamah leh wrestling khawvelah a la nau deuh a, a vannei zawkah ka ṭang. Inchai zo kan haw kha kan veng Melriat ten mn lo hmuak a, a lawmawm dan a danglam bik hle.

"Inchai hlawhtling tak ka neih theih nan EL&TY leh Mizoram Co-operative Apex Bank ten min sponsor a, an chungah ka lawm. Inchaina dawhkan min buatsaih saktu Mizoram Wrestling Association leh LPS chungah ka lawm bawk," tiin Vanglaini a hrilh.