Chona kan pawm a ngai - Pep Guardiola
Manchester City fan-ten an rin aia hmain an tluchhe lai an hmu a, tun season an hman dan meuh chu an hausak hmaa City ang mai kha an ni - an match hnuhnung pariatah vawi khat chiah an la chak!
City hi zanin dar 1:30-ah an inlan zui dawn a, Juventus khelmualah Champions League khel turin an leng dawn. Tun hnaia chak harsat City tan a awlsam dawn lo tih a chiang a, Juve thawnthu a danglam bik lo.
Club pahnih hian tun season UCL-ah match nga khel tawhin point riat ve ve chiah an la nei! Vawi hnih chiah chak an la nei ve ve a, vawi hnih draw neiin, vawi khat an tlawm tawh bawk.
Knockout khel thei dinhmunah club pahnih hi an la ding mek a, mahse, seeded huangah an awm rih lo. Zanina chak lo zawk tan seeded nih chu sawi loh, playoff khelh loh mai chance a awm a, team pahnih tan thapui thawha inkhelh zan a ni e.
A har a ni
Tun season-ah hliam vangin City an talbuai a, beisei ang result an nei thei lo. Manchester khaw club chet chhiat inṭanna hi October 31 kha a ni daih tawh a, League Cup-ah Tottenham Hotspur (2-1) an ngam lo.
City an chet chhiat chhunzawm a, Bournemouth (2-1), Sporting Lisbon (4-1), Brighton & Hove Albion (2-1), Spurs (4-0), Feyenoord (3-3) leh Liverpool (2-0) lakah an chak zo lo zui a, thlatir khan 3-0 a Nottingham Forest hnehin thawk an la zawk!
Mahse, kartawp inkhelah khan Crystal Palace (2-2) nen an inhnehtawk leh hram a, City an tho hleithei meuh lo. An lungngaihna belhchhah turin Nathan Ake a inhliam a, an hliam neih sa Rodri, Oscar Bobb, Mateo Kovacic leh John Stones te a zawm ve.He thu buatsaih a nih lai hian Manuel Akanji dinhmun a chiang lo bawk a, an thiampuipa Kevin de Bruyne pawh 100% a nihna a la rei lo.
Pep meuh pawh a beidawng niin a lang a, Spanish coach hian, "Kan buaina chinfelna ṭha ber chu ka player-te an lo kir a ni a, mahse, tunah chuan a theih si loh. Rei tak chu kan la talbuai dawn niin a lang," a ti a, Pep meuh pawhin 'dawih aw' a chhuah ve ta.
Beiseina
Pep-a'n 'dawih aw' a chhuah kan tih rualin beiseina nei lo erawh a ni lo. Palace nen an in draw zawhah Spanish coach hian, "Ka player-te hnena ka sawi chu, khawngaih takin inthiam lo duh suh u - tunah harsa lehzual dawn mah se kan hmaa chona inchhawp hi pawm zawk rawh u.
"Tichuan, season a tawp meuh chuan nomawi kan chawi ṭum ai khan buaina kara kan talchhuah danin min tihlim zawk mai thei asin, tih hi a ni," a ti a, talchhuah an tum tak tak chuan zanin aṭanga bul an ṭan a ṭul ang.
Juventus-in tun season-ah beisei an phak bik lo a, City tan thawhlehna remchang tak an ni thei dawn! Serie A match ngaah Juve hi la tlawm lo mah se, match 15-ah vawi kua ngawt an khingpui an inhnehtawkpui avangin table-ah parukna an ni.
Champions League-ah City ang thoa beisei phak lo an ni a, mahse, lawmna tur an nei - Douglas Luiz leh Weston McKennie ten training an zawm leh tawh a, zaninah an inlan thei mai thei. Juve hian league stage-ah City tih loh chu club langsar hmachhawn an nei lo a, playoff khelh phak loh hi coach Thiago Motta tan mualphona tawpkhawk a tling dawn.