West Ham an chak ve ta

Premier League match hnuhnung pangaa vawi khat chiah an chak avangin West Ham boruak a nguai hman a, tun hnaiah player chhuanvawr Michael Antonio chu car accident-na lamah a inhliam bawk - Hammers boruak a fuh thei lo.

Mahse, Thawhṭanni zan khan Hammers hian an boruak duhawm lo chu an thlah ve thei ta a, an mikhual Wolverhampton Wanderers chu 2-1 a hnehin, relegation zone chu point kua ngawtin an tlansan ta.

West Ham tan Tomas Soucek leh Jarrod Bowen ten goal khat ve ve an khung a, player pahnih goal khung karah Matt Doherty chuan Wolves tan goal khat a thawh ve bawk - a team kaih harh nan erawh a tawk zo lo.

El Sackico!

Hammers leh Wolves ten tun season Premier League-ah beisei an phak lo ve ve a, coach pahnih Julen Lopetegui leh Gary O'Neil' intawng tur hi fans ṭhenkhat chuan 'El Sackico' tiin hminglem an pe a, a chak lo zawk zawk chu club-in an banna chance a san vang a ni!

West Ham-in mahni khelmualah inkhel an thunun a, goal khung pawh an tum hle. Mahse, Bowen, Carlos Soler leh Konstantinos Mavropanos ten goal khung theihna remchang an neih chu an chhawr lo vek a, goal lut loin chawlhlawk an hmang.

Mahse, second half ṭan aṭanga minute kuanaah Hammers lam hian an khung ta nge nge a, Bowen-a corner aṭanga ball kal chu Soucek chuan a tauh lut. Czech midfielder hian inkhelh zawhah, "Kha goal kha Michail Antonio tan ka hlan a ni," tiin a sawi.

Goal hnih dang

West Ham hian rei tak erawh hma an hruai lo. Minute 15 hnu lawkah Wolves lamin an si phurh an sut ve leh a, Matt Doherty chuan mawi zeta khungin, Premier League khelh chhunzawm zel an la duh tih a pholang.

Mahse, first half-a goal luh lohna inkhel hi second half-ah a nung ṭha a, Wolves ṭantute hlim au thawm pawh a reh fel hman lo - minute thum hnu lawkah Bowen chuan a khung ve leh a, Bowen pawhin Antonio hming chuanna jersey pawt parhin a goal khung a lawm.

Hammers hi 2-1 in an chak a, hnehna an chan avangin table-ah 14-naah an chho a, hetihlai hian Wolves erawh 19-naah an awm - point kua chiah an la nei a, match 15 an khelh tawhah vawi hnih chiah an la chak ve.

Antonio tan...

Kar hmasa Inrinni khan Hammers striker Antonio chu car-in a accident a, a hliam zai zui a ni - engtikah nge a lo kir dawn a la chiang lo. Goal khungtu Soucek chuan, "A dam ṭha tih ka hriatin ka lawm takzet. Ka goal khung pawh a tan ka hlan - kan player pawimawh tak a ni a, ka thinlungah hian a awm reng a ni," a ti.

Kum 34 mi Antonio hi Hammers tana Premier League-a goal khung hnem ber record chelh mektu a ni a, league match 268-ah goal 68 a khungsak. Season khata league goal a khung hnem ber ṭumin goal 10 a khung a, ṭum thum goal 10 khung hi a nei.

Hammers boss Lopetegui chuan, "Car thlalak kha en chuan, hliam na tak a nei lo hi thilmak a ni. Hlawhtling taka zai a ni pawh kan lawm hle," a ti - West Ham hian December 16 zanah Bournemouth lenchilhin league match an khel leh ang.