Chennaiyin khelmualah Hyderabad leng dawn

Indian Super League chu zan hnih ngawt an chawlh hnuah, zanin dar 7:30 hian khelh ṭan a ni leh dawn a, tun hnaia chak hlei thei lo pahnih an intawng dawn - Chennaiyin chuan Hyderabad FC an mikhual ang.

Chennaiyin hian 5-1 ngawta Jamshedpur an sawp hnu khan chak an nei leh tawh lo a, an league match hnuhnung pali aṭangin point khat chiah an hlawh chhuak - Hyderabad lakah an thawnthu thlak danglam an tum dawn.

Hyderabad pawh an chuti lua bik lo. Kerala Blasters laka 2-1 a an chak hnu lawkah Odisha chuan 6-0 ngawtin an sawp a, Mumbai City (1-0) leh FC Goa (2-0) lakah an tlawm zui - zanin hi chak bul ṭan nan hman an tum ve tho ang.

Chennaiyin hian Laldinliana Renthlei, PC Laldinpuia leh Lalrinliana Hnamte te kawlin, hmun pawimawh an chang vek a, Hyderabad-ah goalkeeper Lalbiakhlua Jongte, Ramhlunchhunga leh Isaac Vanmalsawma ten hmun pawimawh an chang ṭhin bawk.