Delhi-in Sreenidi an barakhaih

I League-ah Delhi FC chuan December 9, Thawhṭanni zan khan Sreenidi Deccan 1-0 in an hneh a, goal awmchhun hi Stephane Binong-a'n minute 71-naah a khung. Aizawl FC coach hlui Yan Law hote hi tun season-a an chak vawi khatna a ni.

Deccan Arena-ah mualneitu Sreenidi-in bul an ṭan ṭha zawk a, Panamanian forward Angel Orelien-a'n goal ban a pet per nghal. Mahse, Delhi pawhin Sreenidi tlarhnung an tibuai ve tho a, K. Vanlalhriatzuala'n mual neitu tlarhnung a tibuai pha.

Sreenidi-in chance ṭha an hlah hnem a, Delhi forward Stephane Binong erawhin minute 71-naah Mizo tlangval Jakob Vanlalhlimpuia pass chu goal-ah a chantir thung. Delhi chak turin an vannei tel a, Sreenidi tana William Oliveira goal khung chu offside vangin pawm a ni lo a, replay-ah erawh a offside lo. Injury time-ah Angel Orelien-a'n freekick aṭangin crossbar a pet per leh bawk.

Delhi tan hian Hriata, Lalbiakzuala leh K. Lalmalsawma ten bul an ṭan a, bench aṭangin Jakob a rawn lut. Sreenidi lamah Brandon VL Remdika'n bul aṭan a, bench aṭangin Lalromawia a inlan thung.