Lakers tan match khat a la ngai

Los Angeles Lakers chuan Western Conference final lut turin match khat chak chauh an mamawh tawh. LeBron James awmna Lakers hian nimin zing khan Houston Rockets chu 110-100 in an hneh a, semifinal series-ah 3-1 in hma an hruai fal ta.

Pathianni zing dar 5:30-ah game 5 an khel dawn, dinhmun ṭha zawk Lakers an chak a nih chuan an tlang dawn. James Harden hoa khel Rockets tan final luh beisei turin chak ngei ngei a ngai tawh thung.

James-a'n a thiam thil hmangin Lakers hi hnehna a chanpui zel. American star hian point 16 a neih bakah rebounds vawi 15 a la a, assist vawi kua nei bawkin a ṭangkai leh hle. Minute 40 chhunga point 29 nei thei Anthony Davis sawi hmaih theih a ni lo bawk.

Rockets lam pawhin player ropui an nei ve tho, point 25 neitu Russell Westbrook leh James Harden (21 points) ten an thiam an la theihnghilh bik lo. Mahse player dang aṭanga thlawpna an hmu ṭha tawk lo, an khingpui Lakers lamin basket venhim an thiam bawk avangin a chak loah an ṭang.

Lakers hian hun rei tak chhung chu dinhmun sang an luah ngai lo. Beiseina sang tak nen LeBron James an lalut a, star player Anthony Davis an neih bawk avangin regular season-ah table chung ber luahtu an ni hial.

Playoff-ah pawh team hmuhnawm an ni chhunzawm, kum 10 hnua a vawi khat nan conference final an lut leh ngei dawn niin a lang. An tlang a nih chuan NBA champion nih pawh an tum chhunzawm ngam ang.