Liverpool lawmpuitu Coutinho

Philippe Coutinho chuan a club hlui Liverpool chu an chet ṭhat avanga a lawmpui thu a sawi a, English club a chhuahsan avanga a inchhir loh thu a sawi tel bawk.

Brazil international Coutinho chuan, "Liverpool an vul chho mek a, mak ka ti lo. Nikum khan Champions League-ah an ṭhatzia an lantir tawh a, an squad a ṭhat bakah manager a ṭha bawk. Reds tana khelah hian ṭhian tam tak ka neih avangin ka lawmpui a, thil dang erawh a awm tawh lo. Kawng dang ka zawh tawh a, ka tum ram tihhlawhtlin ngei tumin keipawhin theihtawp ka chhuah ang," tiin a sawi.

Liverpool hian 1990 hnuah league title an beisei mek a, match 25 an khelh tawh aṭanga vawi 24 an chak avangin champion tur pawhin an dinhmun a ṭha hle. Coutinho khelhna Bayern Munich pawhin Bundesliga, DFB Pokal leh Champions League-ah nomawi an la chawi thei vek.

Kum 27 mi Coutinho chuan, "Kan champion vek theih hi kan inring. Champions League harsatzia kan hria a, chutihrualin kan thawhrim phawt chuan engpawh a thleng thei a ni," tiin a sawi.