La Liga an khel ṭan dawn ta

Spanish La Liga pawh khelh ṭan a ni ve dawn ta a, inkhel ngaihven hlawh tia sawi tur erawh a la awm rih dawn lo - La Liga 'big three' zinga mi Real Madrid, Barcelona leh Atletico Madrid-te an la inlan lo vek ang. 

Eibar chuan zanin dar 7:30-ah season thar atana league match hmasa ber ni turin Celta Vigo an mikhual dawn a, zan dar 10:00-ah Granada chuan Athletic Bilbao an mikhual dawn bawk. 

Segunda division aṭanga La Liga kai thar Cadiz chuan zanin dar 12:30-ah an match hmasa ber an khel dawn a, Spanish top flight football-a tawnhriat nei ṭha Osasuna an mikhual ang.

Pathianni zanah inkhel pali a awm dawn bawk a, ngaihven hlawha chhal tur a awm lo - season dang angin La Liga-ah hian Zirtawpni leh Thawhṭanni zanah match a awm lo.

Spanish football-a thuneitu sang ber Royal Spanish Football Federation (RFEF) chuan La Liga lamin fixture an tihchhuah vek tawh hnuah kartawp zan leh kar ṭantira inkhel awm lo tur hian thutlukna an siam leh si a ni. 

La Liga champion lai Real Madrid inkhel en tur chuan kar leh nghah thlen a ngai a, September 20, zan dar 12:30-ah Real Sociedad an lenchilh ang. 

September 27 zanah Atletico Madrid leh Barcelona an la inkhel ve dawn chauh a, club pathum hi European football vanga season an hman rei avangin inlan har zingah an tel a ni.