Serena Williams a ropui zual zel

Inrinni zan khan a vawi thum nan Serena Williams chuan French Open champion nomawi a chawi a, a inkhelh hunchhungin Grand Slam-ah vawi 20 a champion ta.

Kum 1960 leh 1973 inkar khan Margaret Court-i chuan Gran Slam title vawi 24 a lo chawi tawh a, Steffi Graf chuan vawi 22 Grand Slam nomawi a lo chawi tawh bawk.

Kum 2002 leh 2013 te khan Williams hi French Open-ah a lo champion tawh a, a vawi thum nana champion turin a khingpui seeded 13 na Lucie Safarova chu darkar hnih leh minute khat chhungin 6-3, 6-7 (2-7), 6-2 in a hneh.

A tawh hriat ngah tawh avangin final boruak sanfah Williams a zam lo hle a, set khatnaah Safarova service chhuhsak nghalin awlsam tein 6-3 in set a la nghal. Set hnihnaah pawh Williams bawk a che fuh hmasa leh zawk a,4-1 in hma a hruai hman. A chak tlang nghal mai dawna alan laiin Safarova chuan mak tak maiin 7-6 in a chhuhsak ve thung. Set thumna khelh a ngaih phah hial.

A vawi khat nana Grand Slam final khel Safarova hian set hnuhnung berah beiseina a nei sang hman hle a, a service a lak hmasak bakah Serena service chu a chhuhsak zui bawk. Mahse, Williams a zam chuang lo, game hnuhnung paruk ngawt chu la zawnin a chak leh ta a ni.

Kum 2003 khan Williams hian Grand Slam pali Australian Open, French Open, Wimbledon, US Open a lo kawl khawm vek tawh. American tennis star Williams hi kumin July a khelh tur Wimbledon-ah a champion leh a nih chuan nomawi pali hi a kawl kim leh vek dawn a ni.

Eng nge an sawi?

Kum 33-a upa World number 1 Williams chuan, "Tunah chuan ka inring tawkin ka ṭha anih tih hi ka pawm thlap ta. Dik taka sawi chuan a tirah kha chuan ka zam ve lek lek a, a chhan chu Lucie kha player ṭha leh tumruh a ni tih ka hriat lawk vang a ni. A vawi 20 nana Grand Slam nomawi ka chawi thei hi ka lawm a, a bik takin French Open-ah hetiang hun ka tawng hi ka lawm leh zual. Hmun dangah chuan vawi nga ka champion tling vek tawh a, helai hmunah erawh chuan ka vawi thmunna chiah anih avangin a lawmawm dan a dang hle," tiin a sawi.

Kum 28-a upa Safarova chuan, "Ka duh leh beisei ber hmu rih lo mah ila ka lawm tawk tho e. Holam angreng taka set khatna ka hloh avangin set hnihna ka la let thei kha ka lawm hle, a chhan chu set hnihna kha la lo ni ila final ho tak a ni ve thei tlat. Serena kha a thiam bakah tharum a ngah em em a, ka hneh ngang lo a ni. A champion avangin Serena ka lawmpui a, a kal leh zelna turah duhsakna ka hlan e," a ti. Safarova hian final thleng turin Maria Sharapova leh Ana Ivanovic te a hneh a ni.

Nizan khan mipa final-ah Novak Djokovic leh Stan Wawrinka te an inkhel a, result erawh kan hre hman lo. Final thleng turin World number 1 Djokovic hian quaeterfinal-a Rafael Nadal a hneh hnuah semifinal-ah Andy Murray a hneh leh a ni.

Britain chhuanvawr Murray leh Serbian star Djokovic te inkhel hi inkhel hautak leh turu tak a ni a, set khatna leh set hnihna chu 6-3, 6-3 in Djokovic hian la mah se set thumna leh set lina chu Murray-a'n harsa takin 5-7, 5-7 in a la ve thung. Set nganaah erawh 6-1 in Djokovic a chungnung hle thung.

Final-a Djokovic a hmachhan tur Wawrinka hian Roger Federer a hneh hnuah khawtual tlangval Jo-Wilfried Tsonga chu 6-3, 6-7, 7-6, 6-4 a hnehin a vawi hnih nan Grand Slam final a lut ve bawk. Kum 2014 khan Wawrinka hian Australian Open final a lo khel ve tawh. Spain fa chuam Rafael Nadal hnehin a champion nghe nghe.