Berlusconi-a'n Milan a hralh hnai

Italian club lian AC Milan neitu Silvio Berlusconi chuan Milan neitu nihna 48% chu Thai sumdawng hausa Bee Taechaubol hnena hralh a remti a, an inremna ang chuan kar riat dang club hralh dan tur chungchangah hian an inbe leh dawn a, tihfel ngai te tifel hman tura beisei a ni.

Thai sumdawng hausa Tae­chaubol hian hun rei tak chhung chu AC Milan hi lei a lo tum tawh a, Serie A club ropui ber pawl nen hian inremna an siam thei ta a ni.

Milan leh Taechaubol te inrem dan ang chuan Berlusconi hi presi­dent a nih chhunzawm zel anga, a company Fininvest chuan club neitu nihna 52% an la nei chhunzawm zel ang.

Serie A club thuchhuak chuan, " Fininvest managing director Pasquale Cannatelli leh Mr Bee Taechaubol te'n kar riat chhung club neitu nihna nei tura inbiakna neih an remtih chu club president Silvio Berlusconi-a'n a pawmpui a ni," a ti.

Europe a club hlauhawm ber pawl ni ṭhin tunhnaia tluchhe mek Milan chuan Berlusconi leh Taechaubol te chuan theihtawp chhuaha Milan hmasawnna tur an ngaihtuah tur thu sawiin, club ropui tak a lo ni tawh ṭhin ang ngeia a dinhmun pangngaia hruai let leh tura an beih tur thu a sawi.

Thai sumdawng hausa Taechau­bol chuan, "Berlusconi hi dinhmun ropui taka Milan hlangkaitu a ni a, Milan-ah a rilru pe tawk tawh lo anga an sawi hi thudik lo a ni. Hei hi kan inbiakna aṭangin ka hre thei a ni," tiin Berlusconi-a'n a club a hmangaihzia a sawi.

Milan-a 42% neitu nihna nei tura euro maktaduai 500 lai seng anga an sawi Taechaubol chuan Asia mi seng luh vak a tum loh thu sawiin, "Milan hi a chhungrilah a Italian ngawih ngawih a, chu chu he club-in rei tak a lo kalpui tawh a ni. Chuvangin Asian director lakluh nen a inhmeh dawn lo tih ka hria a, a nihphung hloh loa hmasawn turin Milan hi puih ka duh a ni," a ti.