Real-a cham tur Gareth Bale

Wales forward Gareth Bale chuan season duhawm lo tak Real Madrid-ah hmang zo chiah mah se Santiago Bernabeu chhuahsan tumna a neih loh thu a sawi.

Kum 25-a upa Bale hi tun season-ah Real an chet chhiat avangin fan-te'n an dem nasa hle a, La Liga leh Champions League-a an chet chhiat chhanah tam tak chuan an puh a ni.

Kum 2014 Champions League final-a goal khungtu Bale chuan, "Season tharah kan theihtawp kan chhuah anga, Champions League nomawi chawi leh ngei kan tum dawn a ni. Tun kumah final khelh leh ngei tumin kan theihtawp kan chhuah a, kan hun a inherchhuak lo a ni ber e," a ti.

Kum 2013-a world record fee pound makataduai 85.3-a Tottenham Hostpurs aṭanga Real Madrid zawmtu chuan, "Season liamtaah khan ka khel ṭha lo tih ka hria a, mahse ka theihna erawh ka hrechiang a ni. Fan-te min beisei anga ka khelhchhuah loh avangin pawi ka ti a, aṭha thei ang bera khel turin rim takin ka thawk reng a ni," tiin season tharah khelh ṭhat a tum hle.

Season hman zawh taka goal 17 chiah khungtu Bale chuan, "Real Madrid te ang club ropui tana khelh hi ka tan chuan in zirna ropui tak a ni a, ṭha zawka khel chho zel turin ka in zir mek a ni. Khelh ṭhat leh ṭhat loh lai pawn in zirna a tling hrim hrim a, nuam ka ti takzet a ni. Ka duh anga tam goal ka khung lo a ni maithei a, season tharah goal tam zawk khung thei turin chawlh lai pawn rim takin ka thawk ang," a ti.