FIFA thubuai England-in World Cup thlen a chak lo
Tunhnaiah 2018 leh 2022 World Cup thlengtu tur thlan dan chungchang Swiss Court-in a chhuichiang a, Russia leh Qatar te World Cup thlen tur chung chnga an thlen dan hi rinhlelh anga a lo dik lo ngei a nih chuan thlengtu thar an awm a ngai maithei.
Thleng thei tura an sawi lan zinga hming langsar pawl chu England a ni. UK Culture Secretary John Whittingdale chuan World Cup thlengtu tur thlak a ngai a nih chuan England chu lo inrinlawk tawp a ṭhat thu a sawi bawk.
Mahse England-a football thuneitu sang ber Football Association FA chief executive Martin Glenn a ṭawng chhuak a, World Cup thlen an chak loh thu a sawi.
Martin Glenn chuan, "World Cup thlen hi kan chak hran lo. Kum 2018 World Cup phei chu kan rinlawk ang ngeiin Russia-in an thleng dawn a, an thlen tlang ngei ka beisei. FIFA dan leh hrai kan en chuan 2022 World Cup hi chu Europe khawmualpui pawn lama khelh tur a ni a, England tan thlenna hun ṭha a awm lo. Engpawhnise, keini chuan hmun hrang hranga World Cup thlen darh hi ṭha kan ti hrim hrim," tiin world Cup inthlen chhawk ṭha a tih thu a sawi.
Glenn chuan Blatter ban vanga an lawmthu sawi chhunzawmin, "FIFA-ah inthlak danglamna a thlen avangin kan lawm takzet a ni. UEFA leh FIFA ṭha takin kan thawhpui anga, president ṭha leh rintlak kan neih ngei theihna turin hma kan la ang," a ti.