Jack Warner-a eirukna an hailang

May thlaa US department of justice-in eiruk thubuai a siamsak zinga mi FIFA vice-president hlui Jack Warner eirukna document chu tunhnai khan haichhuah a ni.

BBC investigation team zirchianna in a tarlan dan chuan South Africa-in 2010 World Cup an thlen theihna tur khan Warner chuan a pui a, South Africa hian puih manah dollar maktaduai 10 an pe let ve thung.

South Africa lam hruaitu te hian pawisa hi direct-in Warner hnenah hian an pe lo. FIFA kutah a lut phawt a, FIFA hian a hranpa in 4 January, 1 February leh 10 March 2008-ah te pawisa hi CONCACAF account-ah an transfer ve leh a, khatih laia North America khawmualpuia football thuneitu sang ber pawl account hi John Warner-a enkawl a ni.

BBC investigation team chuan he eirukna thubuaia sum chet vel dan document zawng zawng hi a haichhuak vek a, Warner-a khawsakna ram Trinidad and Tobago sports minister Brent Sancho hnenah an thehlut.

Trinidad and Tobago sports minister chuan, "Jack Warner hian rorelna a hmachhawn ngei ngei dawn a, tuna zawhna awm zawng zawng te hi a chhan a ngai ang. A phu tawk hremna a hmuh ngei a ngai dawn a ni," a ti.