Women World Cup 2015 entu an tam dawn

Khawvela hmeichhe football ram leh ram inelna sang ber Women World Cup 2015 chu Inrinni khan Canada-ah neih ṭan a ni.

Kumin hmeichhe World Cup hi ṭum dang zawng aiin en tu an tam tura beisei a ni. Ram 24 aṭanga hmeichhe footballer te inelna tournament hi khawvel hmun hrang hrang aṭangin mi tluklehdingawn khat in an en tura beisei a ni. Kum li liamtaa Germany hmeichhe World Cup khan khawvel pumah entu maktaduai 400 a nei thung. Entu zat ni tura beisei punna hi a tam tham hle.

Ram pariat, Cameroon, Costa Rica, Ecuador, Ivory Coast, Netherlands, Spain, Switzerland leh Thailand te'n a vawi khat nan World Cup hi an khel dawn a, USA leh Germany chu champion tura mipui beisei ber an ni.

A vawi sarih nana neih tur hmeichhe World Cup hi ram 187-ah en theih tura pekchhuah a ni anga, entu tam zawk hi North America aṭangin ni tura beisei a ni. A hmun ngeia en tum pawh an tam. Ticket hi a vaiin 920,000 hralh a ni tawh a, lawmman atana pawisa sen ral tur zat hi dollar maktaduai 15 niin champion team hian dollar maktaduai 2 an hlawh ang. World Cup hnuhnung ber aia pakhatna lawmman tur punna hi 50% a ni.