Champions League La Liga Copa del Rey Barcelona Barcelona Barcelona

Luis Enrique-a'n Barcelona a enkawl season khatnaah treble champion a nih pui a, Catalan club hi treble champion ṭum hnih ni theih hmasa ber an ni.

Inrinni zan UEFA Champions League final-ah Barcelona-in semifinal-a Real Madrid hnehtu Italian champion Juventus 3-1 in an hneh a, Barca midfielder Andres Iniesta chu man of the match a thlan a ni.

Berlin Olympic Sta­dium-ah Croatian midfielder Ivan Rakitic-a'n minute lina lekah Barcelona hmahruaina goal a khung a, minute 55-naah Alvaro Morata-a'n Juventus tan a sut. Italian club-in huaisen takin bei mah se Lionel Messi khelhna Barca attack a na lutuk hret a, minute 68-naah Luis Suarez hmangin Catalan club-in a ṭum hnih nan hma an hruai a, injury time-ah Neymar-a'n Barcelona chakna a nemnghet.

Barcelona-in La Liga leh Copa del Rey an champion hnuah Champions League-ah a ṭum ngana atan an champion. Catalan club hian kum 10 chhungin Champions Leauge final ṭum li an lut a, an champion vek. Juventus erawh European Cup/Champions League final-a vawi ruk chak lo hmasa ber an ni a, vawi hnih chiah an la champion.

Final chu...

Juventus defender Patrice Evra-a'n a sawi lawk ang ngeiin Manchester United tana a khelh laia amah diriamtu Luis Suarez chu a chibai a, team pahnih starting eleven chu rinlawk ang chiah a ni bawk.

Italian club-in final boruak sangah veteran defender Giorgio Chiellini awm loh an tuar a, chutihrualin Lionel Messi ke aṭanga chhuak Neymar leh Iniesta te inrawlh hnua Rakitic-a goal khung erawh a mawi thlawt. Juve keeper Gianluigi Buffon-a'n dan ngaihna a hre lo a, Chiellini pawh awm se a danglam kher lo ang.

Juve an talbuai a, penalty area-a right back Stephan Lichtsteiner handball referee-in a hmuh hmaih hlauh. Arturo Vidal-a che rorum hret a, hnawhchhuah hlauawm khawpin Chilean midfielder hi a khawsa a ni ber.

Manchester United nena sawi zawm Dani Alves-a ball pet keeper Buffon-a'n ṭha taka a dan hnuah Messi ball vawrh Neymar-a'n a khawih pha lo chiah chiah a, minute 20 a nih meuh chuan Barcelona-in goal khungna chance an ngah tawh hle.

Juventus an in pass ngam chho a, Barca angin an passing nal ṭha lo mah se Paul Pogba, Claudio Marchisio leh Andres Pirlo ten an thiamna an lantir ṭan . Juve forward Carlos Tevez leh Morata ten chance ṭha an hlah ve ve.

First half tawp lam erawh Barca thuhnuaia awm a ni. Messi chu Juve defender-te'n an bawr luih hnuah an dang hram a, Suarez-a ṭum hnih chance neih a goal teuh viau bawk.

Second half ṭan chiah­ah Rakitic pass chu Suarez-a'n goal kilah pet mah se Juve keeper chu Buffon a ni tlat. Hemi hnu hian Messi-a'n Neymar leh Suarez te wall pass a neih pui a, Juve tlar hnung hawi hai viau mah se Argentine forward ball pet goal zawnah a kal lo hlauh.

Minute 55-naah Mar­chisio backheel chu Leichsteiner chuan cross nghalin Tevez-a'n goal-ah pet a, Barca keeper Marc-Andre Ter Stegen-a'n dang mah se a per chu Morata-a'n a pet goal chiang hle. French midfielder Pogba chu Barca right back Alves-a'n a buan thluk avangin Juve-in penalty an beisei a, pek an ni lo.

Barcelona hun a inher chhuak nawn a, minute 68-naah Messi ball pet chu Buffon-a'n a dan zawh loh avangin Suarez-a'n goal-ah a chantir a, 2-1 a ni.

Juve-in an siphurh sut tumin an nawr a, counter attack-ah Barcelona an hlauhawm reng bawk. Rakitic-a ball pass Gerard Pique-a'n a pet over luah a, injury time-ah erawh an tisual nawn tawh lo. Juve player tam zawk goal khung tumin an chhuak a, Marchisio freekick chu a nat tawk loh avangin Barca-in nawr let nan an hmang a, Neymar-a'n cool takin a khung.

Brazil captain-in a goal khung a lawm a, referee Cuneyt Cakir-a'n ham tawp zuiin Barcelona an champion.