Spurs khelmualah indinthar tum Everton

Nipui transfer bazar-ah Chelsea-in thawm an nei na ber a, a dawt thlang dawn ta ila Everton hi thlan loh an harsa khawp ang - Merseyside club hian season tharah tih mai mai an tum lo. 

Real Madrid forward James Rodriguez an lakluh theih avangin Everton an pawr thar a, an ṭhenawm lama an ngaihtheih loh tak Liverpool thlengin an tawng ngam ve ta. 

Pathianni zan dar 9:00-ah Everton fan-te nghahlelh season thar atana an match hmasa ber khelh a ni dawn a, Tottenham Hotspur mualah Carlo Ancelotti naute hi an lenglut dawn. 

King Carlo an kawl miau avangin Everton-in player langsar an lalut thei ta hi thil mak a ni lo a, Jose Mourinho enkawl Spurs hian season hmasa anga an thlir a nih chuan an tisual ang. 

Liverpool hliahkhuhna hnuaiah Everton an awm rei tawh a, an ṭhenawm club-in ropuina an chan lai thlir reng bik an duh lo. Chumi tur chuan club-in pawisa an neih phawt a ngai a, pawisa hmanga coach leh player langsar hip a ngai. 

February 2016 khan Arsenal neitu zinga mi Farhad Moshiri-a'n Gunners-ah a beisei anga sum hman a theih loh avangin duh thala sum hman theih dan tur a ngaihtuah a, London club-a a share hralhin Everton-a lei. 

Moshiri hnuaiah Everton-in sum pawh an hmang malh malh viau a, result erawh a awm lo - player lei nan sum seng hnem mah se coach langsar an kawl ṭhin loh avangin player ṭha 'teuh' bak an chang lo!

December 2019-ah coach ropui Ancelotti awl lai an nang fuh a, Juventus, AC Milan, Chelsea, Paris Saint-Germain, Real Madrid, Bayern Munich leh Napoli enkawl theitu coach hi an lalut. 

European football-a coach hlawh hnem pawl la ni phak Ancelotti hi nipui transfer-ah pawh bazar-na tur sum pek a ni a, Moshiri hnuaia manager hmasa te angin uchuak takin sum seng lo mah se player ṭha tak tak lo enkawl tawh a nih avangin player-ten a hnena khelh an chak. 

Club lian tam tak pawhin an awh rawn midfielder Allan chu Napoli aṭangin an chang phawt a, Brazil international an chan theih chhan hi Napoli lama Ancelotti hnuaia a lo khelh tawh vang a ni. 

Ancelotti vang liau liauin Real Madrid leh Bayern lama a lo enkawl tawh hnu James Rodríguez an lalut thei leh bawk a, Colombian attacking midfielder hi game thlak danglam thei khawpa player thiam bik huanga khung theih a tling. 

Watford aṭanga an lakluh Abdou-laye Doucoure pawh hi top class player tia sawi tur la ni lo mah se Premier League club tam tak chil tiputtu a nih avangin Everton-in an chang thei hi an vannei a, kum 19 mi left back, Marseille aṭanga free transfer-a an lakluh Niels Nkounkou erawh inzir belhna tur la nei player a ni. 

Ancelotti-te ang 'class' coach tan chuan European football-a team kaihhruai loh hi a mawi lo a, Italian boss hian season thar atana an tum ber tur chu Europe-a inlan phak a nih thu a sawi. 

Coach-a nih hnua Champions League nomawi vawi thum chawi tawh coach chuan, "Kan tum ber chu European football khelh phak a ni a, kan thei ngei ang tih ka ring bawk a ni," a ti a, Europe-a thlir. 

King Carlo chuan a player thar Rodriguez chungchang sawi zuiin, "A theihna sang tak kan hmuh ka beisei a, he inelnaah hian chu chu a pholang ang tih ka ring tlat a ni," a ti. 

James hian Ancelotti enkawlna hnuaiah Real Madrid-a a season hmasa ber kha a hmang a, inelna hrang hrangah match 46 khelin goal 17-a khung a, assist vawi 18 a nei - ngaihthah a thiang lo. 

Jose Mourinho-a'n la hlawh hnem viau mah se transfer bazar-ah erawh Chelsea, Manchester United leh Real Madrid-te ang chuan sum a ngah lo ang tih chu thil chiang a ni a, a mamawh erawh a lei thung. 

Manchester City goalkeeper hlui Joe Hart an lakluh hian thawm nei viau mah se bench-a ṭhu tur a ni ang tih a chiang a, Southampton aṭanga lakluh midfielder Pierre-Emile Hojbjerg erawh bul ṭan nghal tura beisei a ni. 

Wolverhampton Wanderers aṭanga lak luh Matt Doherty hi Premier League fullback hmuhnawm pawl a ni a, ani pawh hian hmun a chang nghal a nih pawhin a mak lo ang. 

Everton-in transfer bazar-a player langsar an lak thu kan sawi rualin Spurs hi Harry Kane, Son Heung-Min leh Dele Alli kawl sa an nih avangin squad pumpui khaikhin chuan Everton aia ṭha zawka sawi theih an ni - Pathianni zanah an chingfel dawn e.