Kan hlawhtlinna hi kan la hrethiam pha lo - Iniesta

Barcelona-in Cham­pions League-a champion turin APOEL (Cyprus champion), PSG (French champion), Ajax (Dutch champion), Man City (English champion), Bayern Munich (German champion) te an hneh a, treble champion kawngah Real Madrid (FIFA Club World Cup Champion) an hneh bawk.

Final-a man of the match-a thlan Andres Iniesta chuan, "Kan hlawh­tlinna ropui zia hi tun maiah chuan kan hrethiam lo ang. Hrethiam tak tak tur chuan hun kan mamawh," tiin treble champion ṭum hnih an ni thei chu mak a tih thu a sawi.

Barcelona manager Luis Enirque chuan, "Tun thlengin ka hmalam hun tur ka la tichiang lo, tun dinhmunah chuan hlawtlinna chan hi lawm phawt ka duh. Treble champion hi ka inbeisei ngai lo a, amaherawhchu team chhungah hmasawnna awm hi hmuh hmaih chi a ni lo," a ti.

Barca boss chuan sawi zuiin, "Tun season-a kan match 70-na a ni a, vawi 60 kan chakna chiah a ni bawk. Kum chinchhiah tlak tak a ni a, hna ṭha takah ka thawkah ka ngai a, kan hlawhtlinna hi min ṭantute tan ka hlan," tiin a sawi.

Neymar-a'n injury time-ah goal a khung a, tun season Champions League-ah Lionel Messi leh Cristiano Ronaldo te nen goal 10 khungin joint top scorer an ni.

Brazil captain chuan, "Ka hun tawn hi ka sawi thiam lo. Ka ṭhiante ka hmuh khan ka insum zo lo a ni. Ka thawhrimna te, kan chhungkaw min puihnate zarah hun ropui tak ka tawng a, ka theihngilh tawh ang. Ka mittui kha a tla lo thei lo a ni," tiin a sawi.

Barca right back Dani Alves chuan, "Final kha Barca tana ka inkhelh tawpna ber pawh a ni maithei. A lo ni ta a nih pawhin club chhuahsan dan ṭha tak a ni ang. Ka tumah ka chiang a, ka tum chu ka ti hlawhtling a ni," tiin season thara club dang a zawm theih thu a sawi chhuak.

Goal hmahruai khung­tu Ivan Rakitic chuan, "Tun hi kan tawpna lo se ka duh hle. Kum tharah nomawi tam zawk chawi ka duh," tiin hmasawn zel a duhthu a sawi.

Croatian midfielder hian nikum season khan Sevilla chu Europa League a chawi pui a, final-ah man of the match a thlan a ni.