Zanin dar 7:30-ah Inter Village Football Final : Ramhlun North Vs Kolasib Jt
GIG Motors MFA All Mizoram Inter Village Football final chu zanin dar 7:30 hian RG Stadium-ah Ramhlun North leh Kolasib Town Jt ten an khel dawn a, nomawi leh sial inchuhna a nih tawh avangin a boruak a sang dawn.
Inkhel en man hi Rs 50 chauh a ni a, a hmuna kal thei lo tan pawh Zonet Zawlbuk, Rihnim leh YouTube-ah a en theih ang.
A thiam pahnih
Inelna ṭan hmaa team langsar chu Armed Veng, Armed Veng South, Bawngkawn leh Republic Veng te an ni a, inelna ṭan hnuah erawh Kolasib Town Jt an langsar ta ber a, Ramhlun North lah an duai lo viau bawk.
Kolasib hian final thleng turin goal 37 tehmeuh an khung a, goal khat chiah an chhuah. An tumpui apiang lakah inkhel an thunun thei a, game mawi an khel tel bawk. Team ṭhaa chhal Republic Veng, BVT leh Melbuk te an hneh awlsam avangin champion rinkai an ni.
Ramhlun North hian nuam saa chak an nei lo a, team ṭha bik Bawngkawn phei chu penalty shootout hmangin an hneh ṭawk. H. Lalremruata hote hian goal 15 khung tawhin goal riat an chhuah. Hriat tel tur erawh Ramhlun North hian hma an sawn zel a, match hmasa bera Sairang Jt an hneh ṭum ai chuan Tlangnuam an hneh ṭumin an ṭha tawh zawk.
Champion ngam
Ramhlun North coach H. Lalremruata chuan, "Hneh theih loh an awm lo. Final-ah chuan engpawh a thleng thei tawh. Hei leh chen kan chak chhan hi champion kan duh vang alawm," tiin Kolasib hneh ngei an tum thu Vanglaini a hrilh.
Remruata chuan sawi chhunzawmin, "YMA Football-ah chauh ka la champion lo," tiin a sawi zui a, hei hian inrintawkna a ngahzia a sawi lang. Ramhlun North enkawltu Remruata hian NECS Cup-ah Chhinga Veng a champion pui tawh a, Chhinga Veng FC chu Third Division, Second Division, First Division leh MPL thlengin a champion pui tawh a, a record hian a naute thlengin inrintawkna a pe ang.
Ramhlun North chu
Ramhlun North hian First Divison-ah team ṭha tak an nei a, tun ṭum inelnaah Mizoram Police striker F. Lallawmkima leh Aizawl FC player hlui Rohmingthanga te an neih belh avangin belhchian an dawl.
Tlarhnung player-te hi First Division-ah an inkawp tawh ṭhin a, mimal angin ṭha fal awm lo mah se team angin an ṭang thei hle. Chutihrualin Kolasib winger ṭha hmaah chuan right back Lalramsanga leh left back Zothanpuia ten hna an ngah dawn. Coach Remruata'n a ngaihtuahna a sen a ṭul ang.
Ramhlun North tan Vanlalhruaia a nung ṭha ṭhin a, MPL-ah pawh FC Venghnuai tana khel tawh player hi final-ah a chet ṭhat a pawimawh. Mahruaia thlawp turin Lawma leh Lalnunsanga te an pawimawh bawk ang.
A thiam rual
Kolasib Town Jt an nih miau avangin duh thlan tur player an ngah a, mimal anga theihna a san bakah team anga an chet ṭhat miau avangin Aizawl team ṭhaten an khan lo ṭhin hle.
Kolasib laka attacking khel ngam an mualpho a, defensive game khel ho pawh an hlawhtling chuang lo. Odisha FC midfielder Paul Ramfangzauva leh Mohun Bagan forward hlui William Lalnunfela te hi an game chei mawitu tih loh rual an ni lo.
Paul-a'n ball a sem ringawt lo a, game buai laiin inkhel kal hmang a thlak thei a, goal hmaah a hlauhawm tel. William-a'n goal khat chiah la khung mah se tlarhma aṭanga game siamtu a ni a, a pawimawhzia hmuh hmaih a thiang lo.
Goal nawrtu dang PC Pazawna (7), Isaak Malawmkima (7) leh RM Zothansanga (5) ten goal khung an harsat lo. Chutihrualin goal la khung lo MS Dawngzuala hming lam hmaih a thiang lo, mahni hma sial loa team tana kheltu a ni tlat.
Inlungrualna
Kolasib coach Lalchhuansanga chuan, "Kan team hi kan special bikna ka hre lo a, chutihrualin naupang zawkten aia upate an zah a, upa zawkten naupang te an kahhruai thiam. Kan inlungrualna hi kan ṭhatna a ni," tiin Vanglaini a hrilh.
Champion ngei tumin Kolasib hian semifinal an khelh zawhah Aizawlah an cham tlang a, nomawi leh sial hawn ngei an tum. Chhuansanga chuan, "Mipui chuan kan champion an ring a ni thei a, mahse keini chuan a awlsam dawn lo tih kan hria. Chutihrualin kum danga team ka enkawl ai chuan tun ṭuma kan team hi chu kan ṭha zawk," tiin a sawi a, final thlir tura entuṭhahnem tak an rawn kal a beisei thu a sawi bawk.