Real Madrid an vul ve leh ta

Champions League match hnih a zawna an tlawm hnuah Real Madrid an chak ve leh ta a, knockout playoff khel turin beiseina thar an nei - Thawhlehni zan khan Atalanta chu 3-2 in an hneh.

Real Madrid lawmna belhchhah turin chhuanvawr pathum, Kylian Mbappe, Vinicius Junior leh Jude Bellingham ten goal khat ṭheuh an khung a, Charles De Ketelaere (penalty) leh Ademola Lookman te goal khungin awmzia a nei phak lo.

Serie A hmahruaitu Atalanta tan tun season UCL-a an tlawm vawi khatna a ni a, top 8 aṭangin an chhuak bawk. Real tan match ruka an vawi thum chakna niin, point kua an nei a, knockout playoff khelh phak an la beisei ve zel.

A hunah Mbappé

Real-in Atalanta khelmuala goal khung turin hun an mamawh rei lo. Minute 10-na lekah tun hnaia sawisel hlawh tak Mbappe a inlar a, French striker hian Brahim Diaz-a siamsak chu amah vengtu laka tal put chungin goal-ah a chantir a, 1-0 a ni.

Mbappe tan tun season-a goal 12 a khungna a ni a, a chhe lo - a hnu lawkah pawh Real number 9 hian goal khung theihna dang a nei a, a chhawr lo thung. Atalanta an awm mai mai bik lo a, first half tawp hmain Real an hrem zui.

Italian club hian penalty an hlawh chhuak a, Charles De Ketelaere chuan harsatna nei loin goal-ah a chantir. Goal dang lut loin chawlhlawk hman zui a ni a, Real fans an hlauthawng.

Hei le Real

Atalanta-in chawlhlawk hman hma lawkin si phurh an sut hman a, an inringtawk sawt. Mahse, minute 56-naah Vinicius Jr a inlar a, malpui hliam vanga a chawlh reng hnua a inlan leh hmasak berah goal a khung.

Tun hnaia 'form' em em mai Bellingham chuan minute thum hnuah a belhchhah ve leh bawk a, Real hi nuamsain an chak mai dawn niin a lang hman. Mahse, Lookman chuan goal khat khung ve lehin, Spanish club hi hlauthawngin a siam a, goal dang erawh a khung tawh lo.

A tawpah Real Madrid an chak a, an hmabakah Red Bull Salzburg (home) leh Brest (away) an la awm a, an chak ve ve chuan knockout playoff an khel ngei ang.

Lawm a kim lo

Mbappe-a'n goal hmahruai a khung a, Champions League-a goal 50 khung tling thei naupang ber pahnihna a ni a, a chungah Lionel Messi a awm. Mbappe hi kum 25 leh ni 356 mi a ni a, Messi-a'n UCL-a goal 50 a khung tlin khan kum 24 leh ni 284 mi a ni.

Hetihlai hian Real ṭantute tan lawm a kim lo a, Mbappe hi hliam vanga lakchhuah a ngai. Coach Carlo Ancelotti chuan a player hliam hi ngaihtuahawm a nih loh thu a sawi a, an chawlh chen tur sawi chian a la harsa rih.

Ancelotti chuan, "Mbappe khan a malpuiah hliam a nei a, a duh anga a tlan theih loh avangin thlak mai kha a fuhah kan ngai a ni," a ti a, Real player langsar zingah Dani Carvajal, Eder Militao leh Eduardo Camavinga te chu hliam vangin an chawl mek bawk.