Lalchhanhima'n pate title a la let; A chak hnuah inchai a chawlhsan zui

Mizo inchai huanga hming dai tawh ngai lo tur Lalchhanhima chuan, Mahindra XUV3XO Mizo Inchai Title Fight 2024 khelh laiah 'Pate Title' a la let a, champion kawnghren a hren hnuah inchai a chawlhsan tih a puang zui nghal bawk.

Thawhlehni zan khan LPS Arena, Falkland Vengah title fight hi neih niin, pate champion lai B. Lalawmpuia chuan amah chotu Lalchhanhima lakah title a hloh a, thawh (round) 10 inchai turah thawh sarih thleng chauh an inchai.

Saitual fachuam Chhanhima hian 20-0 in hnehna a chang a, thawh riatna an khelh dawnah a khingpui Awp-a hi hliam vangin a khel zui thei tawh lo, thawh sarihna an khelh laiin an intauh palh a, a tirah khelh chhunzawm thei mah se, a hnuah a chhunzawm thei ta lo a ni.

Inchai hmain Lalchhanhima hian an intawn hmasaka amah bawhbettu Awp-a a hneh let tur thu a sawi a, a sawi ang ngeiin a thlentir - inchai a luhchilh hnua amah bawhbet theitu awmchhun a hneh let a, a thil tum a hlenchhuak.

Awp-a a hliam hma pawhin Chhanhima hi chungnung zawk a ni, a hma zawng leh hnung zawngin a bawhbet hma a, khel tluan pawh ni se la a chesual viau a nih ngawt loh chuan a chak tluan a rinawm zawk a ni.

Chhanhima chuan, "Hun rei tak chhung inchai ka luhchilh ve a, tunah chuan ka hun a herliam ve ta. Ka inchai chhunga min duhsaktu, tun dinhmun ka thlen theih nana tha min thawhpui tute zawng zawng chungah ka lawm," tiin Vanglaini a hrilh.

Mizo palian inchai champion ni mek Lalsangliana pawhin Chhanhima thlahna thu sawiin, "Ka ṭhianpa Chhana hian nikum kha inbuatsaih nan thla khat pawh tling mang lo a nei a, ṭha takin khel mah se a vanduai zawk a ni. Kuminah a tumruhzia lantirin malsawmna a dawng ve leh ta hi ka lawmpui takzet," a ti.

Title humhim zo lo mah se champion lai a nih avangin Awmpuia'n Rs 50,000 a dawng a; champion chotu Chhanhima'n Rs 30,000 a dawng thung. Freestyle Wrestling (Exhibition)-a inchaiten Rs 2,500 vek an dawng bawk.