Nute champion Venhimi

Lalvenhimi chuan amah chotu Lalnuntluangi lakah a champion kawnghren a humhim. Bethlehem nula Venhimi hian hna harsa leh hautak lutuk a tawk lo, thawh nga an inchai hnuah 21-2 in a chak.

Thawhlehni zan khan LPS Arena, Falkland Vengah Mahindra XUV3XO Mizo Inchai Title Fight 2024 neih niin, nute champion lai Venhimi hian tharum a ngah bakah a thiam tel tih a lantir a, thawh hmasa berah a khingpui kuai zangthalin, vawi 10 chhiar thleng a bawhbet nghal.

Thawh hnihnaah Tluangi'n beiseiawm takin a bei let a, nawr chhuak chhuakin point a hmu. Tluangin'n bawhbeh zui a tum a, mahse a ṭan hmun phet chu Venhimi'n bei zuiin vawi 10 chhiar thleng a bawhbet.

Tluangi'n chak tura bei let turin hun ṭha a nei tam tawh lo a, thawh hnih la awmah vawi 10 chhiar thleng a bawhbeh ve ve a ngai. Mahse, a puitlin thei lo a, vawi khat a nawr chhuak. Thawh hnuhnung berah Venhimi a nghet a, nalh takin Tluangi a theh chhuak leh a ni.

Champion lai Venhimi'n champion kawnghren a humhim rualin Rs 50,000 a dawng a; Tluangi'n title fight hnuhnung ber 2022 ang bawkin Venhimi a hneh lo leh a, champion chotuin an dawn zat Rs 30,000 a la thung a ni.