Chak loh thiam lo Liverpool

Liverpool an chak leh ta - tun season chhungin Liverpool chak loh thu hi vawi khat chiah kan la ziak a, Reds hi chak loh thiam lo, tia an chanchin kan ziak a nih pawhin demawm kan ni lo e.

Thawhlehni zan khan Champions League-ah Reds hian Girona chu 1-0 in an hneh a, player chhuanvawr Mohamed Salah chuan penalty hmangin inkhela goal awmchhun a khung.

Liverpool-in hnehna an chan avangin UCL match ruk an khelh tawhah an la chak vek a, match hnih khelh tur la awm mah se, playoff an khel dawn tih a chiang tawh a, round of 16 pawh direct-a an luh ngei a rinawm.

Chhandamtu Salah

Girona khelmualah Liverpool-in inkhel an thunun a, ball pawh chang tam mah se, a pawimawh ber goal erawh an khung thei lawk lo - Girona lamin chance an nei ve reng bawk.

Mahse, second half-ah Manchester United midfielder hlui Donny van de Beek chuan Luis Diaz lakah penalty a chawi a, Liverpool tan thiampuipa Salah chuan harsatna nei miah loin goal-ah a chantir.

Kum 32 mi Salah hian tun season inelna hrang hrangah match 22 khelin goal 16 ngawt a khung tling ta a, assist vawi 12 a nei. Champions League bika goal 46 a khungna a ni a, heti zat khung tur hian match 85 a mamawh.

Alisson a lo kir

Liverpool lawmna belhchhahtu chu goalkeeper Alisson Becker lo kir leh ta kha a ni. Brazil international hi October 5-a a inhliam hnuah a la chawl vang vang a, a awm loh hlanin second choice Caoimhin Kelleher che ṭha mah se, an league match hnuhnung bera Newcastle United nen 3-3 a an in draw ṭumin a chesual.

Arne Slot-a'n Alisson bul a ṭantir leh ta a, Brazilian keeper hian khawvela goalkeeper ṭha ber pawl a nih chhan a pholang lehnghal - Bryan Gil, Miguel Gutierrez, Yaser Asprilla leh Arnaut Danjuma te khung tur nia lang chu a dansak.

Manchester United defender hlui Daley Blind pawhin a chance neih duhawm a chhawr lo. Liverpool pawhin chance an nei nual a, mahse, Joe Gomez leh Darwin Nunez ten khung ngei tur nia lang chu an khung thei bik lo.