Amorim leh a naute feh chhuak dawn

Manchester United chuan zanin dar 11:15 hian Europa League khel turin Viktoria Plzen an lenchilh dawn.United leh Czech Republic club hi an inhmachhawn hmasak ber tur a ni ang.

Ruben Amorim-a naute hian Europa League match nga an khelh aṭangin point kua an hmu a, khelh zat inangah Viktoria Plzen nen an point hmuh a inzat - a sang zual pariat zinga tel phak tum an nih avangin an inkhel hi a pawimawh.

Premier League lamah a zawnin Arsenal leh Nottingham Forest te an hneh lo a, an boruak nuam tak kha a dai chho leh mek, tun kartawpa Manchester City nena inkhel tur an nih avangin zanin hi United tan boruak siam kanna hun ṭha a ni ang.

Lisandro Martinez leh Kobbie Mainoo ten hremna an hmang zo tawh a, a tir aṭangin inkhel bul an ṭan thei ang. Nipui laia lakluh Leny Yoro pawh a dam chiang tawh a, an match hnuhnung a khel chhe lo tak Noussair Mazraoui a awm bawk.

Victor Lindelof, Jonny Evans leh Luke Shaw te erawh hliam vangin an la khel thei lo, coach Amorim tan tlarhnung lam hi duhthusam ang taka remkhawm a la harsa rih dawn a, uluk taka ngaihtauhna a sen a ṭul dawn a ni.

Amorim tan chona lian ve tak a ni dawn, tun hmain Mancherster United hian Czech Republic ramah match thum an khel tawh a, chak an la nei miah lo - vawi hnih inhnehtawkin ṭum khat chu an chak lo, an chak a nih chuan United manager zinga tithei hmasa ber a ni ang.

Portuguese manager Amorim hian tlarhma lamah erawh duhthlan tur a nei ṭha. Striker Rasmus Hojlund leh Marcus Rashford te a hman thlak vel ṭhin a, kartawpah inkhel hautak a awm dawn bawk avangin pakhat zawk chu a hahchawlh tirin a rinawm.