Kuminah Neuer inlan tawh dawn lo

Bayern Munich head coach Vincent Kompany chuan goalkeeper Manuel Neuer chu a nakruh hliam vangin kuminah a inlan theih tawh loh tur thu a sawi a, kum 2025-ah bak a lo kir thei dawn lo.

Hetihrual hian Bayern an vannei - German football-in Krismas leh Kumthar chawlh an hman dawn avangin Neuer hian a match ang zawng chuan a khel lo hnem dawn lo a, German club hian an tuar lutuk hman lo ang, tiin a sawi ngam.

Bayern hian tun thlatir khan DFB-Pokal round of 16-ah Bayer Leverkusen an hmachhawn a, he inkhelah hian Neuer hi Jeremie Frimpong nen intipalhin, a inhliam a, red card pek a ni bawk!

Dutch wing back Frimpong-a ball um dan a tumna lamah Neuer hi a tlan chhuak a, a inhliam bakah a career-a a red card hmasa ber pek a ni - a ngaihtuah let ang a, tifuh lo a inti khawp ang.

Kum 38 mi keeper hi kar hmasa Bundesliga-a Heidenheim an hmachhawnna inkhelah pawh a inlan lo a, Thawhlehni zan khan Champions League-ah 5-1 a Shakhtar Donetsk an hneh ṭumin a inlan lo bawk. Hei bakah hian league lama Mainz leh RB Leipzig an hmachhawn hunah a inlan thei dawn lo.

Bayern hian tun dinhmunah player inhliam an nei nual a, goalkeeper-ah pawh second-choice Sven Ulreich a inhliam ve mek avangin third-choice Daniel Peretz-a chungah an innghat mek a, Peretz hian Heidenheim lakah khan bul ṭanin, Shakhtar lakah si ban a nghak bawk.

Ukrainian club lakah hian Bayern hian goal an chhuah hmasa zawk a, Kevin chuan minute ngana lekah goal hmahruai a khung. Mahse, German club hian Michael Olise-a goal hnih leh, Konrad Laimer, Thomas Müller leh Jamal Musiala te goal khat ṭheuh hmangin an chhanglet - Olise goal pakhat zawk hi penalty aṭanga lut a ni.

German club hian hliam vangin Joao Palhinha, Serge Gnabry, Harry Kane, Kingsley Coman, Alphonso Davies leh Josip Stanisic te ho an la chhawr thei lo mek bawk a, rei tak hnuah Aleksandar Pavlovic chu bench-ah a hmel hmuh tur a awm ve leh ta thung.