Semifinal-ah Thunder leh Bucks

NBA Cup khelh laiah nimin zing khan Oklahoma City Thunder leh Milwaukee Bucks te chuan an khingpui ve ve hnehin semifinal an lut a, an tumram thleng turin kawng dik an zawh.

Western Conference quarterfinal-ah Oklahoma City Thunder hian Dallas Mavericks chu 118-104 in an hneh a, an chak theih nan point 39 neitu Shai Gilgeous-Alexander a thawh hlawk hle bawk.

Mavericks tan Klay Thompson leh Naji Marshall ten point 19 ve ve an nei a, an player ṭha pakhat Luka Doncic chuan point 16 nei ve hman mah se hnawhchhuah a ni a, hun pawimawh laiah an chhawr thei lo.

Hnehna changtu Thunder hian an match lehpekah chuan Golden State Warriors leh Houston Rockets te inkhela chak zawk an hmachhawn leh ang.

Eastern Conference quarterfinal lamah Giannis Antetokounmpo pawhin a team Bucks chu Orlando Magic lakah 114-109 in a chakpui - Greek tlangval hian an chak theih nan point 37 ngawt mai a nei a, a thawhhlawk takzet a ni.

Milwaukee tan Damian Lillard a langsar bawk a, ani hian point 28 a neih zinga 15 chu quarter hnuhnung bera a neih a ni a, a ṭhiante basket neih tur vawi kua a siamsak bawk.

Bucks hian semifinal-ah chuan Atlanta Hawks leh New York Knicks te inkhela chak zawk an hmachhawn leh ang.