WTA player of the year chu Sabalenka

Hmeichhe tennis thuneitu sang ber - Women's Tennis Association (WTA) chuan kumin chhunga player chawimawina hrang hrang a sem chhuak a, award ngaihhlut hlawh ber WTA Player of the Year chu Aryna Sabalenka kutah hlan a ni.

Belarus star Sabalenka hian season a hmang ṭha hle a, kumin chhungin nomawi pali a chawi. Season bul ṭanna Australian Open leh Grand Slam zinga hnuhnung ber US Open nomawi a chawi a, a kar lakah Cincinnati Open leh Wuham Open nomawi a chawi bawk.

October thla khan thla 11 chhung a zawna world number 1 ni thei Iga Swiatek a nek chhuak a, hliam vangin Wimbledon leh Paris Olympic te khel thei lo mah se, a inlan theihna hoah a hlawhtling thei hle a ni.

Tun hnai kum hnih chhung chu Swiatek khan WTA Player of the Year chawimawina hi a la ṭhin a, tunah chuan Polish nula hi Sabalenka chuan world ranking bakah award thlengin a nek chhuak ta a ni.

WTA Award hi international tennis media-ten vote hmanga an thlan a ni.