AFC Cup 2020 tihtawp a ni

Asia khawmualpuia club football inelna ngaihhlut hlawh ber dawttu AFC Cup chu Covid-19 vangin khelh chhunzawm a ni dawn lo a, AFC Champions League erawh karleh lamah khelh chhunzawm a ni dawn thung. 

Asian Football Confederation (AFC) chuan thuchhuah siamin, "AFC Cup khelh chhunzawm tura ngaihtuahna a sen hnuah AFC chuan kan hun tawn ngaihtuahin a harsa niah a ngai a, AFC Cup chu loh theih lohin tihtawp a ni ta a ni," tiin thuchhuah an siam. 

AFC Cup hi Asian football-ah chuan Europa League level a ni a, January 21 khan inelna hi neih ṭan niin group stage pawh khelh zawh hman a ni lo - tunah khel zo lo mai turin thutlukna an siam ta a ni. 

India aiawhin Chennai City pawh inelnaah hian group stage chinah an inlan a, I League champion nih vanga inlan South Indian club hian match khat chauh la khel hmanin Maldivian club ṭha Maziya S&RC chu 2-2 in an inhnehtawkpui. 

AFC president Sheikh Salman bin Ebrahim al-Khalifa chuan, "Football-in a zawm leh infiamna khawvela hun hmang tu te tan chuan hun harsa tak a ni," tiin thutlukna chu an duh thu renga siam an nih bik loh thu a sawi. 

Sheikh Salman chuan, "AFC leh a hnuaia member-te sum dinhmun ngaihtuah ran chungin thutlukna kan siam a ni," a ti a, club-ten sum lamah harsatna an tawh loh chu an ngaihtuahna luah liantu zinga mi a nih thu a sawi tel. 

AFC Cup hi April thla khan Covid-19 vangin tihtawp a ni a, June 2020-a khelh chhunzawm leh tura ruahmanna siam a ni. Mahse, beisei anga thil a kal theih loh avangin September 23-a khelh chhunzawm tur a nih thu an puang leh. 

Asian football thuneituten an ruahman dan chuan inelna hi December 12-a khelh zawh hman a ni - mahse September 10 khan khelh chhunzawm theih a nih rih loh thu puan a ni a, niminah khan tihtawp law law a nih thu an puang zui leh a ni. 

AFC hian AFC Cup chauh hi a tihtawp a ni lo - UAE-in a thlen tur AFC Futsal Club Championship pawh khelh a nih loh tur thu puan a ni a, AFC Futsal Championship bik erawh thla khata pawt hlain December-ah inelna hi neih tur a ni. 

Asian football thuneitute rua-hman dan ang chuan AFC Futsal Championship hi Kuwait-in a thleng ang a, December 2 aṭanga 13 thleng a awh dawn a ni. 

Hetihlai hian kumina inelna neih tur zinga mi AFC Under 16 Championship leh AFC Under 19 Championship pawh kum 2021 kum tir lama neih turin rel a ni a, a ni leh thla puanzar a ni lo thung. 

Bahrain-in a thlen tur AFC U16-ah hian India pawh inelna hmachhawn turin an tling ve a, Blue Tigers rawlthar rual hi Group C-ah South Korea, Australia leh Uzbekistan-te nen dah ho an ni. Uzbekistan-a neih tur AFC U19-ah erawh India an inlan dawn lo thung a ni. 

India rama football thuneitu sang ber All India Football Federation chuan season thar ṭan nan futsal championship buatsaih an tum thu an lo sawi tawh chu Covid-19 vangin an ti thei rih dawn lo a, inelna ṭan leh hun tur hi a chiang lo niin Vanglaini chuan thu a dawng. 

AIFF Futsal Club Championship hi Meghalaya-in a thlen tura ruahman a ni a, a tirah chuan July-a neih tum ni mah se Covid-19 vangin August emaw September-ah neih turin sawn a ni - mahse hri lengin zia lam a pan theih tak lohah chuan sawn leh phawt a ni. 

May 27, Vanglaini chhuakah khan AIFF Futsal Club Championship khelh a nih tur thu hi tarlan a lo ni tawh a, Vanglaini chuan I League CEO Sunando Dhar be pawpin ani hian inelnaah MFA Futsal League champion bakah Aizawl FC an tel tur thu a sawi tawh. 

Mahse, AFC Futsal Club Championship meuh pawh khelh loh turin rel a ni tawh a, AIFF tan I League leh Indian Super League-a awm bawk si avangin Futsal Club Championship khelh hun sawn hlat mai hi thutlukna fing a ni.