October thlaah attacking game kan khel ang - Low

Germany-in Nations League-ah chak an la nei lo a, tun season-a match hnih an khelh tawhah Spain leh Switzerland nen 1-1 ve ve in an inhnehtawk.

Die Mannschaft hian match hnuhnung pahnihah hian tun hmaa an khelh loh danin 'man marking' in an khel a, an ti fuh tawk lo. Joachim Low chuan, "Kan khelh dan hmang kha kan la tih ngai loh a ni a, chutihrualin kan match pahnihah khan hman ngei ka duh. Thiam belh turin hun kan duh dawn a, chutihrualin tih dik ṭum pawh kan nei nual a ni," tiin an khelh dan hmang a sawi.

Germany hian October thlaah Ukraine leh Switzerland te a hmachhawn leh dawn a, November thlaah Ukraine leh Spain nen an inkhel leh dawn. Match hnih khelhah point hnih chauh an la hmuh avangin chak ngei a pawimawh tawh ang.

Low chuan, "October leh November thlaah chuan kan ṭhat dan berin kan khel thei tawh ang. Player pasarih aṭanga pariat an rawn let thei dawn a, hei hian danglamna a thlen ang. Chumi hunah chuan attacking game kan khel ang a, hnehna kan chang ang," tiin attacking game an khelh tawh tur thu a sawi.

Germany hian tun ṭumah hian Champions League final khel Bayern Munich player pawimawh an ko lo a, Spain leh Switzerland nen an inkhelh ṭumah Joachim Low-a'n a player neih ṭhat ber a chhawr lo tihin a sawi theih.

Chutihrualin Low hian Thomas Muller, Jerome Boateng leh Mats Hummels te koh a tum tawh lo. Bayern forward Muller hian season ṭha tak a hman avangin Germany-in result ṭha an neih loh apiangin a chanchin an sawi ri leh ṭhin a, October leh November thlaa Low-a hote goal nawr a na lo a nih chuan Muller chanchin bawk sawi rik a ṭul leh ang.