Shakhtar lakah Real an tlawm

Champions League-a vawi 13 ngawt champion tawh Real Madrid-in Thawhlehni zan khan Shakhtar Donetsk 2-0 in an hneh lo. Los Blancos hi tla thei dinhmunah an ding a, manager Zinedine Zidane erawhin ban tumna a la neih loh thu a sawi thung. 

NSC Olimpiyskiy, Kiev-ah Shakhtar tan Dentinho leh Manor Solomon ten second half-ah goal an khung a, Spanish club lianin a chhanletna an nei lo. Group B inkhel dangah Inter Milan-in Borussia Monchengladbach 3-2 in an hneh a, team paliin knockout stage luh beiseina an la nei vek.

Europe-a champion ngun ber Real Madrid leh Shakhtar Donetsk hi club history aṭanga khaikhin chi an ni lo a, Ukranian club hian kawng engkimah Los Blancos hi an elpha lo.

Amaherawhchu tun sea-son-ah Shakhtar hian Real Madrid hi an ngam hle. Tun ṭum hi an vawi hnih hnehna a ni a, October thla khan Estadio Alfredo Di Stefano-ah 3-2 in an hneh tawh bawk.

Zinedine-a hote hian ṭan phat aṭangin attacking game an khel a, Karim Benzema cross chu Marco Asensio-a'n hnai tak aṭangin goal ban a pet per. Croatian midfielder Luka Modric-a'n Benzema tan ball ṭha a vawrhluhsak a, Real captain hian goal-ah a chantir thei lo.

Martin Odegaard leh Asensio te pawhin Shakhtar tlarhnung nalh takin ṭhiat mah se keeper Anatoliy Trubin an paltlang thei lo. First half-ah goal a lut lo a, Real Madrid chu team ṭha zawk an ni.

Second  half-ah Benzema leh Nacho ten chance ṭha an hlah a, Shakhtar forward Taison-a'n ball pet ṭha zet Thibaut Courtois-a'n a dansak bawk. Amaherawhchu defender Mendy ball clear fuh tawk lo chu Dentinho-a'n nangchingin minute 57-naah goal hmahruai khung nan a hmang.

Zidane-a'n chak tumin Vinicius Jr., Mariano leh Isco te a luhtir a, mahse mualneitu lamin substitution an siam fuh zawk. Goal hmahruai khungtu Dentinho hian minute 25-naah inhliam Moraes a thlak a, minute 74-naa Taison aia rawn lut Manor Solomon-a'n minute 82-naah chak nemnghehna goal a khung ve bawk.

Real Madrid-in inhliam vangin Sergio Ramos leh Eden Hazard te an chhawr thei lo a, tun hmaa player langsar awm khawmna tih ṭhin khan tawnhriat nei tlem leh player chuai tawh lam bak an thawhchhuah pui lo. Benzema, Toni Kroos leh Modric te ṭhatzia sawi nawn a ngai lo a, amaherawhchu an vanglai a pel ṭan a tih theih.

French defender Raphael Varane-a'n vanglai hun a hmang chho a, chutihrualin Sergio Ramos a awm loh chuan Real Madrid tlarhnung a phui tawk lo. Player dang  Martin Odegaard, Vinicius Junior, Marco Asensio leh Rodrygo te hi chu mawhphurhna tak tak la turin an la patuai deuh.

Real Madrid hi Champions League-ah ringawt an talbuai lo a, La Liga-ah pawh match thum chhung chak hmel an hmu tawh lo. Zidane-a hote group stage paltlang lo thei dinhmunah an ding a, chutihrualin Inter Milan-in Borussia Monchengladbach an hneh avangin an kutah engkim a la awm.

Los Blancos hian match hnuhnung berah German club Gladbach hi an hmachhawn dawn a, an muala khelh tur a ni bawk avangin Zidane hoten chak beiseina an nei sang ang. Amaherawhchu Real hian kartawpah Sevilla an hmachhawn dawn a, hahdamna hun ṭha an nei dawn lo.